Тожикистон президенти Эмомали Раҳмоннинг уч нафар жияни шифокорлар ва мансабдорларни қаттиқ дўппослади, деб хабар бермоқда «Радио Озоди» ўз манбаларига таяниб. Ҳодиса 20 июль куни, уларнинг онаси, президентнинг синглиси Қурбонби Раҳмонованинг ўлимидан кейин содир бўлган.
Нашр маълумотларига кўра, 64 ёшли Қурбонби Раҳмонова коронавирусга чалинган ва Тожикистон президенти ижро аппарати қошидаги тиббий марказда даволанган.
Президентнинг синглиси учун атайлаб Германия, Россия ва Ўзбекистондан тажрибали мутахассислар таклиф қилинган. Унинг ўлимидан икки соат аввал улар тожикистонлик шифокорларнинг беморни даволаш услубини нотўғри деб атаган.
«Бу хулоса Қурбонби Раҳмонованинг фарзандларида ғазаб ва норозилик уйғотди: Фахриддин, Фаррух ва Зиёдали Сафаровлар онасининг ўлимидан кейин дарҳол ўша ерда бўлган шифокорларга ва тиббиёт соҳаси мансабдорларига ташланган. Уларни фақат президентнинг тўнғич ўғли Рустам Эмомали тинчлантира олган», — дея нашр манбаси маълум қилди.
Тожикистон соғлиқни сақлаш вазири Жамолиддин Абдуллозода ва давлат раҳбари ижро аппарати қошидаги тиббиёт маркази раҳбари Холмаҳмад Раҳимзода энг кўп жабрланган.
Нашрнинг Ички ишлар вазирлиги ва Соғлиқни сақлаш вазирлигидаги манбалари аниқлик киритишича, вазир жағидан кучли зарба еган, марказ раҳбарининг эса боши шикастланган. Қолган шифокорлар енгил жароҳатлар олган.
Бундан ташқари ССВ раҳбари 26 июль куни АҚШ томонидан Тожикистонга 1,5 миллион доза Moderna вакцинаси етказиб берилиши муносабати билан ўтказилган матбуот анжуманида қатнашмади. Унинг ўринбосари Шодихон Жамшид журналистларга вазир хизмат сафари билан чет элга кетганини маълум қилди.
Тожикистон ИИВ воқеа юзасидан суриштирув бошлаган, ҳозирча ҳеч ким қўлга олингани йўқ.
Маълумотларга қараганда, Эмомали Раҳмоннинг ўндан ортиқ яқинлари коронавирусга чалинган. 5 июль куни президентнинг қайнонаси Ўзбекби Асадуллоева ҳам COVID-19 оқибатида вафот этганди.
Тожикистон ССВ статистикасига кўра, 27 июль ҳолатига мамлакатда пандемия бошидан буён 14 673 кишида коронавирус аниқланган, шуларнинг 118 нафари вафот этган. Аммо тиббиёт ходимлари ва экспертлар расмий статистикани шубҳа остига қўймоқда.
Эслатиб ўтамиз, Тожикистон президенти Эмомали Раҳмоннинг синглиси — 64 ёшли Қурбонби Раҳмонова 20 июль куни ҳаётдан кўз юмганди.
Тожикистонда 2021 йилнинг 11 январидан буён коронавирусга чалиниш бўйича бирор-бир расмий ҳолат қайд этилмаган. 26 январь куни президент Эмомали Раҳмон мамлакат коронавирус устидан ғалаба қозонганини эълон қилган, шу билан бирга, аҳолини ниқоб режимига риоя қилиш ва масофа сақлашни унутмасликка чақирган.
Июнь ойи бошида ОАВда Тожикистонда коронавирус қайтадан авж олгани ҳақида хабарлар тарқалди. Соғлиқни сақлаш вазирлиги эса буни қатъиян рад этди ва хабарларни фақатгина миш-миш деб атади.
Кейинроқ Тожикистонда коронавирусга чалиниш ҳолатлари ҳақида расман маълум қилинди. Шу муносабат билан, мамлакатнинг ҳар бир фуқаросидан ушбу соҳадаги мутахассисларнинг тавсияларига қатъий амал қилиш, зарурат бўлмаган жойга бормаслик, жамоат жойларида ниқобдан ва бошқа дезинфекцияловчи воситалардан фойдаланиш талаб этилади.
Июль ойи бошида Тожикистонда вояга етган аҳоли учун COVID-19’га қарши эмланиш мажбурий этиб белгиланди.
Изоҳ (0)