Tojikiston prezidenti Emomali Rahmonning uch nafar jiyani shifokorlar va mansabdorlarni qattiq do‘pposladi, deb xabar bermoqda “Radio Ozodi” o‘z manbalariga tayanib. Hodisa 20-iyul kuni, ularning onasi, prezidentning singlisi Qurbonbi Rahmonovaning o‘limidan keyin sodir bo‘lgan.
Nashr ma’lumotlariga ko‘ra, 64 yoshli Qurbonbi Rahmonova koronavirusga chalingan va Tojikiston prezidenti ijro apparati qoshidagi tibbiy markazda davolangan.
Prezidentning singlisi uchun ataylab Germaniya, Rossiya va O‘zbekistondan tajribali mutaxassislar taklif qilingan. Uning o‘limidan ikki soat avval ular tojikistonlik shifokorlarning bemorni davolash uslubini noto‘g‘ri deb atagan.
“Bu xulosa Qurbonbi Rahmonovaning farzandlarida g‘azab va norozilik uyg‘otdi: Faxriddin, Farrux va Ziyodali Safarovlar onasining o‘limidan keyin darhol o‘sha yerda bo‘lgan shifokorlarga va tibbiyot sohasi mansabdorlariga tashlangan. Ularni faqat prezidentning to‘ng‘ich o‘g‘li Rustam Emomali tinchlantira olgan”, — deya nashr manbasi ma’lum qildi.
Tojikiston sog‘liqni saqlash vaziri Jamoliddin Abdullozoda va davlat rahbari ijro apparati qoshidagi tibbiyot markazi rahbari Xolmahmad Rahimzoda eng ko‘p jabrlangan.
Nashrning Ichki ishlar vazirligi va Sog‘liqni saqlash vazirligidagi manbalari aniqlik kiritishicha, vazir jag‘idan kuchli zarba yegan, markaz rahbarining esa boshi shikastlangan. Qolgan shifokorlar yengil jarohatlar olgan.
Bundan tashqari SSV rahbari 26-iyul kuni AQSh tomonidan Tojikistonga 1,5 million doza Moderna vaksinasi yetkazib berilishi munosabati bilan o‘tkazilgan matbuot anjumanida qatnashmadi. Uning o‘rinbosari Shodixon Jamshid jurnalistlarga vazir xizmat safari bilan chet elga ketganini ma’lum qildi.
Tojikiston IIV voqea yuzasidan surishtiruv boshlagan, hozircha hech kim qo‘lga olingani yo‘q.
Ma’lumotlarga qaraganda, Emomali Rahmonning o‘ndan ortiq yaqinlari koronavirusga chalingan. 5-iyul kuni prezidentning qaynonasi O‘zbekbi Asadulloyeva ham COVID-19 oqibatida vafot etgandi.
Tojikiston SSV statistikasiga ko‘ra, 27-iyul holatiga mamlakatda pandemiya boshidan buyon 14 673 kishida koronavirus aniqlangan, shularning 118 nafari vafot etgan. Ammo tibbiyot xodimlari va ekspertlar rasmiy statistikani shubha ostiga qo‘ymoqda.
Eslatib o‘tamiz, Tojikiston prezidenti Emomali Rahmonning singlisi — 64 yoshli Qurbonbi Rahmonova 20-iyul kuni hayotdan ko‘z yumgandi.
Tojikistonda 2021-yilning 11-yanvaridan buyon koronavirusga chalinish bo‘yicha biror-bir rasmiy holat qayd etilmagan. 26-yanvar kuni prezident Emomali Rahmon mamlakat koronavirus ustidan g‘alaba qozonganini e’lon qilgan, shu bilan birga, aholini niqob rejimiga rioya qilish va masofa saqlashni unutmaslikka chaqirgan.
Iyun oyi boshida OAVda Tojikistonda koronavirus qaytadan avj olgani haqida xabarlar tarqaldi. Sog‘liqni saqlash vazirligi esa buni qat’iyan rad etdi va xabarlarni faqatgina mish-mish deb atadi.
Keyinroq Tojikistonda koronavirusga chalinish holatlari haqida rasman ma’lum qilindi. Shu munosabat bilan, mamlakatning har bir fuqarosidan ushbu sohadagi mutaxassislarning tavsiyalariga qat’iy amal qilish, zarurat bo‘lmagan joyga bormaslik, jamoat joylarida niqobdan va boshqa dezinfeksiyalovchi vositalardan foydalanish talab etiladi.
Iyul oyi boshida Tojikistonda voyaga yetgan aholi uchun COVID-19’ga qarshi emlanish majburiy etib belgilandi.
Izoh (0)