Ўзбекистон Олимпия делегациясининг маросим либоси ва спорт экипировкаси кимлар томонидан ишлаб чиқарилган?

Ўзбекистон Олимпия терма жамоаси вакиллари Токиода бўлиб ўтаётган ёзги Олимпия ўйинлари очилиш маросимида Ideal (Ideal Business Center) бренди костюмларида чиқди. Ўйинлар учун спортчиларнинг экипировкаси ва спорт кийимлари эса 7SABER бренди томонидан тайёрланди, деб ёзмоқда «Gazeta.uz»

Нашр ушбу маълумотнинг Миллий олимпия қўмитаси (МОҚ) томонидан ҳам тасдиқланганини маълум қилди. Ўтган 2020 йилнинг февралида МОҚда Токиода бўлиб ўтадиган Олимпия ва Паралимпия ўйинларида Ўзбекистон делегацияси учун спорт экипировкаси ва парад формаси тақдимоти бўлиб ўтганди. Ўшанда қўмита форма эскизини яратиш бўйича халқаро танловда 100 дан ортиқ номзодлар қатнашгани, танланган намуналар Президент ва ҳукуматга тақдим этилгани ҳамда Шавкат Мирзиёевнинг ижобий фикр билдиргани айтилганди. Шунингдек, Тошкент тўқимачилик ва енгил саноат институти проректори Ҳолида Комилова спортчиларнинг таснифига қараб, ҳар бир комплект индивидуал тарзда яратилишини таъкидлаганди.

Бироқ спортчилар Токиога бошқа парад формаси ва бошқа экипировакада йўл олди.

Ideal Business Center раҳбари Муҳаммаджон Қодиров «Gazeta.uz»га МОҚ Олимпия терма жамоаси учун парад формаси дизайни бўйича тендер 2019 йилнинг охирида эълон қилганини маълум қилган.

«Тендер эълон қилинган ва дизайнерлар ўз лавҳалари, лойиҳаларини берган. Шундан 10 таси танланган. Ўнтасидан кейин сараланган 5—6 та лойиҳа бош вазирга кўрсатилган ва якуний натижа Президент томонидан танлаган», — дейди Муҳаммаджон Қодиров.

Қодировнинг сўзларига кўра Ideal компанияси тасдиқланган дизайн асосида фақат формани тикиш ишлари билан шуғулланган.

«Дизайнини танлашда ҳам қатнашганмиз. Танловда икки нафар номзоднинг дизайни тасдиқланган. Яъни битта дизайнернинг моделидан ранг олинган ва қолиплар, фасони эса бизники бўлган», — деди компания раҳбари.

Муҳаммаджон Қодиров гап дизайнни танлаш бўйича ўтказилган тендер ҳақида кетаётганини қайд этиб ўтди — тикиш билан шуғулланувчи компания эса олдиндан маълум бўлган.

«2016 йилдаги Олимпиадага ҳам формани биз тикканмиз. Боксчилар Жаҳон чемпионатини ютиб келиб, байрамда оқ костюм шимда чиқди — уни ҳам биз қилдик», — дейди у.

МОҚнинг 2020 йилги тақдимотида Buka (бренд эгаси Buka Boxing Sportswear) логотипи туширилган формани ҳам кўриш мумкин эди. Бироқ спортчилар Токиога юқорида таъкидланганидек 7SABER экипировкасида йўл олди.

7SABER маҳаллий брендининг тақдимоти 2021 йилнинг 25 июнь куни ўтказилган эди. Шу билан бирга, айрим спортчиларда (Улуғбек Рашидов, Баҳодир Жалолов) баҳордан бери ушбу бренд формасида эканини кўриш мумкин.

7SABER брендининг яралиш тарихи 2019 йилга бориб тақалади. «Spot» нашрининг ёзишича, ўшанда Триатлон федерациясининг собиқ раҳбари Отабек Умаров бутун дунёга машҳур бўлган иконалар асосида турли спорт турларини тасвирлайдиган график элементни яратган. Таъкидланишича, узоқ вақт мобайнида логотипнинг тижоратга ҳеч қандай алоқаси бўлмаган. Муаллиф уни спорт ташкилотлари ва ишлаб чиқарувчилари томонидан эркин фойдаланишига эътироз билдирмаган.

Бу профессионал спортчилар билан бирга ишқибозлар орасида ҳам бирдек бренд машҳурлигининг ошишига таъсир кўрсатди. 7SABER’да буни миллий маркетингнинг намунаси деб аташди.

2020 йилда эса спорт экипировкасини ишлаб чиқаришга сармоя киритмоқчи бўлган Дубайнинг Berkeley Square Investmentс компанияси Ўзбекистонда маркетинг ўрганишларини олиб борган ва 7SABER элементининг мамлакатда машҳурлик ва содиқликка эга эканини аниқлаган.

Шундан сўнг Berkeley Square Investmentс раҳбарияти Ўзбекистонда ўз манфаатларини ифодаловчи Urban Hayot компанияси орқали муаллиф билан музокараларга киришган ва якунда лицензия битими имзолаган.

Шу тариқа эмблемадан фойдаланиш ҳуқуқи 5 йил муддатга Urban Hayot компаниясига ўтади. Компания 2020 йилнинг 2 декабрида Тошкентда рўйхатдан ўтказилган. Компания таъсисчилари сифатида Росс Коннон ва Ўраз Абдураззоқов кўрсатилган. Келишувга эришиш вақтида логотипнинг на фонетик эшитилиши, на аниқ номланиши бўлган — у фақат дизайнга эга эди.

Бренд яратилишига INSTID Лондон санъат институти ва Тошкент GRANDPR агентлиги жалб этилган, шу тарзда 7SABER пайдо бўлган, деб ёзади «Gazeta.uz» «Spot» нашрига таяниб.

Отабек Умаров эса ўзининг Instagram саҳифасида ушбу эмблема ҳақида шундай деганди:

«Қалбга қадрли бўлган лойиҳанинг қайта туғилишини кўриш — жуда ажойиб туйғу. Бир неча йил аввал қалам эскизлари ва болалар спорт мактаблари учун илк кийимлар тўпламида яратилган ғоя кеча янги ёрқин бренд сифатида намойиш этилди. Бир нечта ихлосмандларнинг ташаббусидан катта сармоявий лойиҳага қадар бўлган йўл энг қисқа вақт ичида босиб ўтилди. Энди бошқалар лойиҳани давом эттирсин, мен аввал ихтиро қилган белги яхши қўлларда эканига шубҳам йўқ».

Президентнинг 2021 йилнинг 25 июндаги қарори билан (ПП-5160) Ўзбекистон Миллий олимпия қўмитасига ҳамда Ўзбекистон Миллий паралимпия қўмитасига Олимпия ва Паралимпия ўйинларига тайёргарлик кўриш учун спорт анжомлари, жиҳозлар, ускуналар, делегация расмий либослари, спорт кийимлари (экипировкаси), спорт тиббиёти жиҳозлари, тиббий-биологик препаратлар харид қилиш бўйича хорижий ва маҳаллий ишлаб чиқарувчилар билан шартномаларни, шунингдек, ўқув-машғулот йиғинлари бўлиб ўтадиган спорт базалари, ётоқхона, спорт заллари ва спорт жиҳозлари ижаралари тўғрисида ҳамда овқатланишни ташкил қилиш юзасидан шартномаларни тўғридан-тўғри расмийлаштириш ва тўловларни амалга оширишга рухсат берилганди.

Шунингдек, истисно тариқасида, давлат харидлари бўйича махсус ахборот порталида тегишли эълон жойлаштирмасдан ва электрон савдоларсиз, тендерсиз, тўғридан-тўғри расмийлаштириш ва тўловларни амалга оширишга ҳам рухсат берилган.