Тошкентда коронавирус билан боғлиқ вазият ёмонлашгани сабаб МСКТга (мултиспирал компьютер томографияси) тушиш ва «Ремдесивир» дори воситасининг нархи кўтарилиб кетди. Ҳатто баъзи жойларда нархлар икки баробар фарқ қилмоқда, деб ёзади «Подробно».
Нашрнинг таъкидлашича, мамлакатда бозор иқтисодиёти ва хусусий марказлар, шунингдек, дорихоналар қонун бўйича ўз нархини белгилашга ҳақли. «Бироқ ҳаёт учун курашаётган шундай оғир пайтда тадбиркорлар балки аҳолига ён босиши керакдир?», — дея савол билан мурожаат қилинган.
Маълум қилинишича, ҳозирда пойтахтда МСКТ нархи 100-350 минг сўм оралиғида. Қимматроқ бўлган жойларда навбат узун эмас, нархлари арзон марказларда эса одам жуда кўп. Қайд этилишича, нархи 220 минг сўмгача бўлган барча жойда 100-200 кишилик навбатлар бор.
Истеъмолчиларнинг сўзларига кўра, энг арзон МСКТ — «Боткина» рўпарасидаги диагностика марказида (100 минг сўм). Табиийки, бу ерда навбат жуда узун. Арзонлиги бўйича иккинчи ўринда Болалар ортопедик маркази жойлашган (115 минг сўм). Шу билан бирга, нархлар мунтазам ўзгариб турмоқда, асосан, ошяпти.
Ҳиндистонда ишлаб чиқарилган «Ремдесивир» дори воситасининг нархи Тошкент дорихоналарида 390 минг сўмдан 800-900 минг сўмга чиқиб кетган. Унинг маҳаллий муқобили эса 325-600 минг сўм атрофида.
Аввалроқ Тошкентда коронавирусга чалинган беморларни даволаётган хусусий клиникалар рўйхати, нархи ва манзиллари эълон қилинганди.
Эслатиб ўтамиз, 2020 йилнинг июлида Ўзбекистонда профилактика, касалликнинг юқишини олдини олиш мақсадида ишлатиш мумкин бўлган дорилар қаторига «Ремдесивир» ҳам киритилган эди. Ўшанда ЖССТ «Ремдесивир»ни коронавирусга қарши курашда «умид уйғотувчи» дори воситаси деб атаган. Препарат коронавирус кўпайишини блоклаш хусусиятига эга эканлиги канадалик олимлар томонидан апрель ойида аниқланганди. Кейинроқ ЖССТ COVID-19’ни даволаш учун «Ремдесивир»ни қўллашга қарши чиққан.
Изоҳ (0)