Ўзбекистоннинг айрим вилоятларида Президент мактабига кириш имтиҳонлари бўлиб ўтди. «Дарё» ва ЎзА имтиҳонлар ўтказилаётган жойлардан фотосуратларни тақдим этди.
Пандемия сабаб 2020/2021-ўқув йили учун Президент мактабларига қабул 2021 йилга қолдирилганди. Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлиги директори Ҳилола Умарованинг ёзишича, 26, 27 ва 28 июль кунларига белгиланган имтиҳонлар очиқ ҳавода ва карантин чораларига риоя қилинган ҳолда ўтказилади.
Имтиҳонларни икки сменада ўтказиш режалаштирилган эди: соат 08:00 дан 09:00 гача ва 19:00 дан 20:00 гача. Ота-оналардан фарзандларини белгиланган вақтдан камида бир ярим соат олдин олиб келишлари сўралган. Мамлакатдаги эпидемиологик вазият туфайли имтиҳон вақти 90 дақиқадан 60 дақиқагача қисқартирилди.
«Дарё» мухбири хабар берганидек, Қаршида тест синовлари 26 июль куни «Насаф» стадионида бўлиб ўтган. 2880 нафар бола учун имтиҳонлар душанба куни 08:15 да бошланган. Жорий ўқув йилида Қашқадарё вилоятида ўқувчилар 5—10-синфларга қабул қилинади.
Душанба куни Намангандаги «Навбаҳор Умид» стадионида яна 6000 нафарга яқин ўқувчи 5 ва 6-синфлар учун имтиҳон топширди.
Блогер Исроил Тиллабоев ўзининг Telegram-каналида минглаб болалар учун тест синовлари Фарғона ва Марғилондаги стадионларда бўлиб ўтганини маълум қилди ва болалар қуёш тиғи остида ўтиришга мажбур бўлганини танқид қилди.
Қайд этиш жоизки, аввалроқ синоптиклар Эрон ҳудудларидан жуда иссиқ ҳаво кириб келиши ҳисобига 24—26 июль кунлари Ўзбекистонда юқори ҳарорат кузатилиши ҳақида хабар берган эди. Ушбу кунларда ҳаво ҳарорати иқлимий меъёрлардан 4—6 даража юқори бўлиши, кундуз кунлари ҳаво ҳарорати 41—44 даражагача, жанубда ва чўл ҳудудларида баъзи жойларда 45—46 даражагача исиши айтилган эди. ФВВ хавфсизлик чораларини кўришни сўраб SMS хабарномалар юборганди.
«Gazeta.uz» илтимосига кўра, вазиятга изоҳ берган бола ҳуқуқлари бўйича вакил Алия Юнусова имтиҳонларни ушбу кунларда ўтказиш бош вазир Абдулла Арипов бошчилигида апрель ойида ўтказилган йиғилиш баённомасида кўзда тутилганини қайд этган. Болалар омбудсмани имтиҳонларни қабул қилиб олувчи Буюк британиялик мутахассисларнинг Ўзбекистонга келгани сабабли кириш имтиҳонлари бошқа кунга кўчирилмаганини ҳам қўшимча қилган. Унинг сўзларига кўра, узоқ ҳудудлардан келган болаларнинг ота-оналари ҳам кириш имтиҳонлари саналарининг ўзгаришига қарши бўлган.
«Болалар кириш имтиҳонларини топшириши учун тегишли шароитлар билан таъминланиши керак эди, деб ҳисоблайман. Ҳақиқатан ҳам, ФВВ, ССВ ҳамда ‘Ўзгидромет’ аномал иссиқ, ҳарорат 46 даража ва ундан баланд бўлишини прогноз қилган эди. Ҳарорат юқори бўлиши муносабати билан уйда бўлиш тавсия қилинганди. Тасвирларда айрим болаларнинг ҳақиқатан ҳам бош кийимсиз, ниқобларда ўтиргани акс этган. Бундай ҳароратда қуёш нурлари тўғридан-тўғри тушадиган очиқ жойда бўлиш бола саломатлигига зарар етказиши мумкин», — деган болалар омбудсмани.
Алия Юнусованинг сўзларига кўра, Президент, ижод ва ихтисослаштирилган мактабларни ривожлантириш агентлиги директори Ҳилола Умаровага имтиҳон топшириш учун зарур шароитларни яратишга оид кўрсатмалар ва болалар саломатлиги учун ҳар қандай хавф-хатарлар бўйича огоҳлантиришлар берилди.
Изоҳ (0)