Афғонистонда президент Ашраф Ғани бошчилигидаги Вазирлар Маҳкамаси истеъфога чиқса ва музокаралар йўли билан янги ҳукумат тузилса, «Толибон» сулҳ тузишга тайёр. Бу ҳақда «Толибон» матбуот котиби Суҳайл Шоҳин Associated Press (АP)га берган интервьюсида айтиб ўтди.
«Шоҳиннинг таъкидлашича, музокаралар йўли билан танланган ва зиддиятнинг барча томонлари учун мақбул бўлган ҳукумат ўз ўрнини эгаллаб, Ғани ҳукумати кетганида ‘Толибон’ қуролларини ташлайди»— дея хабар беради агентлик.
«Шуни аниқ айтмоқчиманки, биз ҳокимият учун монополияга ишонмаймиз, чунки илгари Афғонистонда ҳокимиятни монополлаштиришга уриниб кўрган ҳар қандай ҳукуматлар муваффақиятга эриша олмаган. Шунинг учун биз ўша формулани такрорлашни хоҳламаймиз», — дейди Шоҳин.
Шунингдек, у яқинда Қатарда бўлиб ўтган «Толибон» ва Афғонистон ҳукумати ўртасидаги музокараларни юқори баҳолади. Шу билан бирга, Шоҳин «Толибон» номидан Кобулнинг ўт очишни тўхтатиш ҳақидаги такрорий чақириқларини рад этди ва токи Ашраф Ғани ҳокимиятда қолар экан, бундай бўлмаслигини таъкидлади.
Интервью мобайнида «Толибон» вакилининг ваъда қилишича, янги ҳукумат даврида аёлларга ишлашга, таълим олишга, сиёсатда қатнашишга, эркак қариндошисиз уйдан чиқишга рухсат берилади лекин улар ҳижоб ёки рўмол ўраши талаб қилинади. Шунингдек, у ҳудудларни эгаллаб олиш пайтида шафқатсизликка йўл қўймаслик тўғрисида раҳбариятнинг буйруғини эътиборсиз қолдирган ҳаракатнинг айрим командирлари ҳарбий трибуналга олиб келингани ва жазоланганини таъкидлади.
Шоҳиннинг айтишича, «Толибон» Кобулда ҳарбий ҳужум уюштиришни режалаштирмаяпти ва шу пайтгача вилоят марказларига ҳужум қилишдан тийилган. Унинг сўзларига кўра, «Толибон» мамлакат ҳудудларининг аксариятини жанговар ҳаракатлар билан эмас, балки музокаралар натижасида эгаллашга муваффақ бўлган, акс ҳолда саккиз ҳафта ичида 194 та ҳудудни мустақил равишда қўлга киритиш қийин бўларди.
«Биласизми, ҳеч ким, шу жумладан, мен ҳам фуқаролар урушини истамайман», — деб таъкидлади Шоҳин.
Бундан ташқари, Шоҳиннинг айтишича, АҚШ ҳарбийларига ёрдам берган афғонистонлик таржимонлар «Толибон» таъқибидан қўрқмаслиги керак. Унинг сўзларига кўра, Афғонистондаги иқтисодиётнинг ёмон аҳволи туфайли Ғарб мамлакатларидан бошпана сўраган афғонистонликларга қарши «Толибон»нинг ҳеч қандай хусумати йўқ.
Аввалроқ ҳаракатнинг расмий вакили Забиулла Мужоҳид «Толибон» Афғонистон чегараларининг 90 фоизини ўз назоратига олгани ҳақида баёнот берганди. Афғонистон Мудофаа вазирлиги вакили ўринбосари Фавад Аман Мужоҳиднинг маълумотларини рад этди.
«Бу асоссиз тарғибот», — деди Аман. У «Толибон»нинг баёнотини «мутлақо ёлғон» деб атаб, мамлакат чегаралари, барча «йирик шаҳар ва автомобиль йўлларини» ҳукумат кучлари назорат қилаётганини таъкидлади.
Фавад Аманнинг маълум қилишича, Афғонистон ҳукумат кучлари «Толибон» жангариларини Ғарбий Ҳирот вилоятининг Карух туманидан қувиб чиқарган.
«Террорчилар катта йўқотишларга дуч келди ва ҳудудни тарк этди. Туман энди тўлиқ Афғонистон мудофаа ва хавфсизлик кучлари назоратида», — деб ёзган Аман Twitter’да.
Афғонистон Мудофаа вазирлигининг сўнгги маълумотларига кўра, ўтган 24 соат ичида ҳукумат кучлари билан жанглар давомида 152 жангари ўлдирилди, яна 53 нафари яраланди, кўплаб қурол-яроғ ва ўқ-дорилар йўқ қилинди.
«Кун давомида Лахор, Кунар, Пактия, Ғазни, Қандаҳор, Балх, Саманган, Жузжон, Ҳелманд, Нимроз, Қундуз ва Каписа вилоятлари ҳудудида жанглар бўлиб ўтди», — дейилади Мудофаа вазирлиги баёнотида.
Мавзуга доир: «Толибон» ва дунё: ким кимга керак?
Изоҳ (0)