Ўзбекистонлик гимнастикачи Оксана Чусовитина Instagram орқали мурожаат қилиб, уни қўллаб-қувватлаган барчага ташаккур билдирди. Чусовитина Ўзбекистоннинг Токио—2020 даги байроқдори бўлиши белгиланган, бироқ Олимпиадага бир кун қолганда байроқдорлар ўзгарганди.
Қадрли мухлисларим, қўллаб-қувватлаганингиз учун барчангизга катта раҳмат. Келинг, бугунги кунни хафагарчиликда ўтказмаймиз, бугун Очилиш маросими. Бу кунни жуда узоқ кутдик. Келинг, хурсандчилик қиламиз, жилмаямиз ва барчага мухлислик қиламиз. Яқин орада мусобақалар бошланади. Муносиб иштирок этиш учун бизга хотиржамлик керак. Ҳаммага катта раҳмат, барчани қучиб қоламан. Барчамизга омад ёр бўлсин.https://www.instagram.com/p/CRqqwdzp0lz/Оксана Чусовитина, гимнастикачи
Қайд этиш жоиз, аввалроқ Миллий олимпия қўмитаси матбуот хизмати Олимпиада очилиш маросимида Ўзбекистоннинг икки байроқдоридан бири Оксана Чусовитина бўлишини эълон қилинганди. Иккинчиси эса бокс бўйича терма жамоа аъзоси Бобоусмон Ботуров бўлиши лозим эди.
Бироқ очилиш маросимига бир кун қолганда байроқдорлар ўзгарди ва боксчи Баҳодир Жалолов ва таэквондочи Нигора Турсунқулова Ўзбекистон байроқдорлари бўлиши эълон қилинди.
Мазкур ҳолат юзасидан МОҚ бош котиби Ойбек Қосимов баёнот берган, Ўзбекистон байроқдорларини танлашда ҳар бир спорт тури бўйича мусобақалар тақвими, шунингдек, барча делегатлар ва спортчиларнинг фикри инобатга олингани ҳақида айтганди.
Оксана Чусовитина байроқдорлар ўзгаргани борасида ҳеч ким унга изоҳ ва тушунтириш бермагани, бу воқеадан кейин иштиёқи сўнгани ҳақида гапирди.
Туризм ва спорт вазирлиги эса ўз баёнотида Чусовитина ўзининг сўнгги Олимпиадасига жиддий ҳозирлик кўриш мақсадида ўз ўрнини бўшатгани ҳақида маълум қилди.
Эслатиб ўтамиз, бу Оксана Чусовитина учун фаолиятидаги саккизинчи Олимпиада ўйинлари ҳисобланади. Спортчи Токиодаги Олимпиададан сўнг фаолиятини якунлашини айтиб ўтган.
Изоҳ (0)