Туризм ва спорт вазирлиги нима сабабдан Токио—2020 Олимпиадаси очилиш маросимига бир кун қолганда Ўзбекистон байроқдорлари алмашганига изоҳ берди.
Сўнгги паллада Ўзбекистон спорт делегацияси байроқдорлари ўзгарди. Чунки эртага (24 июль куни — изоҳ «Дарё») Бобоусмон Ботуров рингга чиқиши керак. Хавфсизлик нуқтаи назаридан очилиш маросимида иштирок этадиган ҳар бир киши тадбирдан бир неча соат олдин стадионга етиб бориши, тадбир давомида тик оёқда туриши, текширувлардан ўтиши лозим. Бу эса спортчиларни уринтириб қўйиши табиий. Шуни инобатга олган ҳолда Ўзбекистон делегацияси раҳбарияти байроқдорларни ўзгартиришга қарор қилди. Бобоусмоннинг ўрнини ўзбек бокси фахри Баҳодир Жалолов эгаллади.Аввалроқ МОҚ Токиодаги Олимпия ўйинларида Ўзбекистоннинг байроқдорлари гимнастикачи Оксана Чусовитина ва боксчи Бобоусмон Ботуров бўлиши ҳақида маълум қилганди. Бироқ очилиш маросимига бир кун қолганда байроқдорлар ўзгарган.Ўз навбатида 25 июль куни баҳсларга киришадиган Оксана Чусовитина ҳам ўзининг сўнгги Олимпиадасига жиддий ҳозирлик кўриш мақсадида ўз ўрнини бўшатди ва спорт гимнастикаси афсонасини Нигора Турсунқулова алмаштирди.
Туризм ва спорт вазирлиги
Қайд этиш керак, Бобоусмон Ботуров Токио—2020 Олимпиадасидаги дастлабки жангини баёнотда келтирилган 24 июль куни эмас, 27 июлда ўтказади. Боксчи рейтингда юқори ўринда тургани боис ўз юришини 1/8 финалдан бошлаши 22 июль куни ташланган қуръадан кейин маълум бўлганди.
Оксана Чусовитина эса байроқдорлар ўзгаргани борасида ҳеч ким унга изоҳ ва тушунтириш бермагани, бу воқеадан кейин иштиёқи сўнгани ҳақида маълум қилди.
МОҚ бош котиби Ойбек Қосимов Ўзбекистон байроқдорларини танлашда ҳар бир спорт тури бўйича мусобақалар тақвими, шунингдек, барча делегатлар ва спортчиларнинг фикрини инобатга олингани ҳақида айтганди.
Токио—2020 Олимпиадаси очилиш маросими Тошкент вақти билан 16:00 да бошланади. Делегациялар паради эса 16:30 дан старт олади. парадни Олимпия ўйинлари ватани ҳисобланган Греция мамлакати бошлаб беради. Сўнгра бошқа мамлакатлар япон алифбоси кетма-кетлиги бўйича стадионда кўриниш беради. Ўзбекистон делегацияси тартиб бўйича 25-ўриндан жой олган.
Изоҳ (0)