Бухоро вилояти Ғиждувон туманида ўқишга киритиб қўйишни ваъда қилиб, фуқародан пул талаб қилган шахслар ушланди, дея хабар қилмоқда вилоят ИИБ матбуот хизмати.
Ғиждувон тумани «Пахтаобод» маҳалласида яшовчи Тошкент давлат аграр университетининг 24 ёшли 4-босқич талабаси И.О. ва Самарқанд вилояти Нарпай тумани «Тошрабод» маҳалласида яшовчи ТАТУнинг 21 ёшли 3-босқич талабаси У.Ш. билан биргаликда Қ.Ж.га уни Бухоро давлат университетининг иқтисод факультетига ўқишга киритиб қўйишни ваъда қилган.
Улар бунинг эвазига Қ.Ж.дан 60 миллион сўм сўраб, пулларни фирибгарлик йўли билан олаётган вақтда қўлга олинди.
Мазкур ҳолат юзасидан И.О. ва У.Ш.га нисбатан Жиноят кодексининг 168-моддаси (фирибгарлик) 2-қисми «а» банди билан жиноят иши қўзғатилиб, дастлабки тергов ҳаракатлари олиб борилмоқда.
Бундан аввал Сурхондарёда талабаларни 5,4 миллион сўмга чув тушириб кетган шахсга нисбатан жиноий иш қўзғатилгани, Тошкентда фуқарони Жисмоний тарбия университетига ўқишга киритиб қўйиш учун 7 минг доллар сўраган ўқитувчи қўлга олингани ҳамда Сурхондарёда талабанинг ўқишини Қозоғистондан Ўзбекистонга кўчириб бериш учун 15,6 миллион сўм ва 300 доллар сўраган шахс ушлангани ҳақида хабар берилганди.
Изоҳ (0)