Андижон шаҳрида 350 нафар томошабинга мўлжалланган биринчи муз саройи иш бошлади, дея хабар берди «Дарё» мухбири.
Таъкидланишича, мазкур мажмуага 17 миллиард сўм сарфланган.
«Замонавий, миллий меъморчилик санъати ва илғор технологиялар асосида қурилган муз саройи давлат раҳбари томонидан илгари сурган беш ташаббус ижросини таъминлаш мақсадида ташкил этилган бўлиб, аҳоли ўртасида соғлом турмуш тарзини тарғиб қилиш, шунингдек, вилоятда қишки спорт турларини оммалаштириш мақсад қилинган. Мажмуада 20х40 ўлчамдаги табиий муз қопламали спорт майдони, эркаклар ва аёллар учун фитнес зали, ташриф буюрувчиларга мўлжалланган умумий овқатланиш маскани ҳамда коньки ижара маркази мавжуд. Шунингдек, аренада турли спорт тадбирлари, мусобақалар ва бошқа ижтимоий-кўнгилочар тадбирлар ўтказиш имконияти мавжуд», — дейди муз саройи ташаббускорлари.
Қўшимча қилинишича, муз саройида бир вақтнинг ўзида 50 дан зиёд спортчи машғулот олиб бориш имкониятига эга бўлиб, келгусида масканда фигурали учиш, хоккей каби қишки спорт турлари бўйича секциялар очиш ҳам режалаштирилган.
Очилиш маросимида пойтахтдан ташриф буюрган хоккей ва фигурали учиш усталарининг кўргазмали чиқишлари намойиш этилган.
Изоҳ (0)