Тошкентда ЙПХ ходимлари ҳайдовчини ургани ҳақидаги хабарлар юзасидан ЙҲХББ маълумот берди

Ижтимоий тармоқда «4 нафар ГАИ ходимлари мени урди» сарлавҳаси остида видео тарқалди. Ушбу видео юзасидан ЙҲХББ маълумот берди.

Маълум қилинишича, 2021 йил 14 июль куни соат 16:00 ларда Тошкент шаҳар ИИББ ЙҲХБ ЙПХ инспекторлари И.Тошматов ва С.Бегматовлар «А.Турбанов» ЙПХ масканида хизмат олиб бораётган вақтда Isuzu русумли юк автомашинаси ҳайдовчиси ходимларнинг тўхташ ишорасига бўйсунмай ҳаракатда давом этган.

Кўрилган тезкор чора-тадбирлар натижасида транспорт воситаси тўхтатилган ва текшириш давомида ҳайдовчининг ҳужжатлари тўлиқ эмаслиги аниқланган.

Ҳайдовчига Маъмурий жавобгарлик тўғрисидаги кодекснинг 135, 194-моддаларига асосан маъмурий баённома расмийлаштирилиб, автомашина жарима майдонига жойлаштирилган.

Мазкур ҳолат юзасидан Тошкент шаҳар ИИББ ЙҲХБ томонидан хизмат текшируви ўтказилмоқда.

Бундан аввал Сурхондарёда маст ота 12 ёшли ўғлининг Damas ҳайдашига рухсат бергани, Сурхондарёда тўхташ ишорасига амал қилмай, ЙПХ ходимини уриб кетган ҳайдовчи қамоққа олингани ҳамда Жиззахда ЙПХ ходимини уриб, унинг «погон»ини ечиб олган ҳайдовчи ҳибсга олингани ҳақида хабар берилганди.