Бухорода 230 минг аҳолини тоза ичимлик суви билан таъминловчи сув тозалаш иншооти таъмирланди

Бухоро вилоятининг Олот туманидаги 46 йил олдин қурилган «Икки даҳа» сув тозалаш иншооти модернизация қилинди, дея хабар берди «Дарё» мухбири.

Бухоро шаҳри марказидан, тахминан, 130 километр олисдаги ушбу сув тозалаш иншооти 1975 йил қуриб битказилган бўлиб, Олот ва Қоракўл туманлари кесишмасидаги сув йўлида жойлашган.

«Бухоро сув таъминоти» МЧЖ директори Шоҳрухали Саъдуллаевга кўра, эскирган ушбу иншоот қурилганидан буён бирор маротаба модернизация қилинмаган. Сув қувурлари эскирган, насослар ва электр жиҳозларидан фойдаланиш хавфсизлиги таъминоти етарли даражада бўлмаган. Бу бевосита иншоотдан аҳолига етказиладиган сув сифатининг истеъмолга яроқсиз ҳолда бўлишига олиб келган. Беш йилдан буён аҳолига ичимлик суви етказиб бериш қуввати суткасига бор-йўғи, 12 минг метр кубни ташкил этган.

«46 йилдан сўнг сув иншоотининг модернизация қилингани Қоракўл ва Олот туманларининг 230 минг аҳолисини тоза ичимлик суви билан таъминлаш йўлидаги улкан ғалаба, десак адашмаган бўламиз. Зеро, бу икки чекка туман аҳолиси тоза ичимлик суви масаласида узоқ йиллар давомида муаммоларга учраб келган. Иншоотда модернизациялаш ишлари Жаҳон банкининг қиймати 139 миллион долларлик кредити асосида амалга оширилди. Амударё сувлари йирик сув омборхоналарида замонавий усулда уч маротаба тозаланиб, фильтрланади. Бу орқали бир кунлик ичимлик сувини етказиб бериш қуввати 50 минг куб метрга етказилди. Бу Олот ва Қоракўл туман аҳолисининг ичимлик сувидаги эҳтиёжи тўлиқ қопланади, дегани. Яна бир аҳамиятли жиҳати, аввалги йилларда ичимлик суви тармоқлари фақатгина аҳоли яшаш пунктларигача етказиларди. Жорий йилдан бошлаб эса ичимлик суви тармоқлари аҳоли хонадонларигача тортилиб, ҳисоблагичлар ўрнатилмоқда», — деди Шоҳрухали Саъдуллаев.

Бухоро ҳокими Ботир Зарипов мазкур йирик сув иншоотида бўлиб, Олот ва Қоракўл аҳолисининг ичимлик суви билан таъминланганлик ҳолати ҳамда сув сифати даражасини яхшилаш бўйича олиб борилаётган ишлар билан танишган.

«Сув таъминоти тизимларида сув жуда арзон нархда тарқатилишини ҳисобга олиш зарур. Вилоятимизда бир метр куб ичимлик суви ўртача тарифда аҳоли истеъмолчилари учун 2450 сўмни, бюджет ташкилотлари ва бошқа улгуржи истеъмолчилар учун 4420 сўмни ташкил қилади. Унинг қиймати савдо дўконларида сотиладиган сувга қараганда арзонлигини кўрсатмоқда. Шунингдек, 1 кВт/соат электр энергияси нархи 295 сўм, 4—5 кишилик оиланинг бир ойлик истеъмоли 60—70 минг сўмни, 1 куб метр табиий газ 380 сўм, худди шу оиланинг бир ойлик истеъмоли 200—250 минг сўмни ташкил этади. Шу оила бир ой давомида 15 минг литр ичимлик суви истеъмол қилса, унинг нархи 15—16 минг сўм атрофида бўлади. Кўриняптики, бугунги кунда ичимлик суви нархи коммунал тўловлар орасида энг паст кўрсатгични ташкил этмоқда», — деди вилоят раҳбари.

Бухоро ҳокими, шунингдек, сув манбалари чексиз эмаслигини, уни қадрлаш ва тежаш маданиятини ҳам унутмаслик кераклигини таъкидлаган. Ва айрим хонадонлардаги ҳовуз, бассейнлар ичимлик суви билан тўлдирилишини, боғлар соатлаб суғорилишини, исрофгарчилик юқорилигини танқид қилди.

«Ҳар бир фуқаро ичимлик сувидан фойдаланишда тежамкорликка амал қилса, йилдан йилга камайиб бораётган сув захираларининг келгуси авлодларга ҳам етиб боришини таъминлаган бўлади», — деган Ботир Зарипов.