Тошкентда 20 ёшли ўғлини ўлдириб, уни ертўлага кўмиб қўйган эркакка суд ҳукми ўқилди

Тошкентда ўз ўғлини ўлдирган отанинг жинояти орадан икки йил ўтиб очилди ва унга нисбатан ҳукм ўқилди. Бу ҳақда Олий суд бош консултанти Акром Ариповга таяниб, «Халқ сўзи Online» хабар берди.

Маълум қилинишича, 2018 йил 27 августида ичиб олган М. уйига келиб уйқуга кетган. Ишдан келган ота эса унинг ётишини кўриб ғашланган.

Шундан сўнг, эркак ухлаб ётган ўғлини судраб ҳовлига олиб чиққан, йигит шунда ҳам уйғонмаган. Ота ҳовлида ётган кетмон дастасини олиб унинг тўғри келган жойларига урган. Салгина ингроқ товушини эшитиб, жаҳлдан тушиш, бироз ўзига келиш учун ҳаммомга кирган ота юз-қўлини ювиб чиққан. Бироқ яна жаҳл отига миниб, бошқа бир кетмон дастаси билан ерда ётган йигитни калтаклашда давом этган.

Эртасига, 28 август тонгида ота ўғлининг қўлларини келиб ушлаган уни ўлдириб қўйганини тушуниб етган.

Ота мурдани йўқотишга аҳд қилади ва уйининг ертўласига икки соатлар мобайнида чуқур ковлаб, ўзи ётган уйнинг деворига қоқилган қизил духобани олиб чиқиб майитни ўраган ва уни ертўлага судраб кириб кўмган.

Орадан бир-бир ярим ой ўтгач, ертўладан келаётган бадбўй ҳид ҳовлига тарқала бошлаган. Бу эшикдан кирган ҳар қандай кишини шубҳага солиши мумкинлигини ўйлаган ота ертўлани қалин қилиб цементлаб, икки кун электр печи билан қуритади ва уйида боқаётган қуёнларини шу ерга олиб келиб қамайди.

Оиланинг турмушга чиқиб кетган қизи ҳам бор бўлиб, у акаси анчадан буён алоқага чиқмаётганидан хавотирланган ва ИИБга бориб, акасининг йўқолгани, отасидан шубҳаси борлигини билдирган.

2019 йилнинг октябрь ўрталарида ота ИИБга чақирилган. Ваҳимага тушган эркак уйига қайтгач, ертўладаги цементни кўчириб, у ердан ўғлининг жасадини кавлаб олади. Ўралган духоба аллақачон чириб кетган, майит ҳам бир аҳволда бўлгани боис қисилиб қолган оёқларининг тўпиғидан пасти узилиб тушиб қолган. Мурдани томга олиб чиқиб яширган ота ертўлани текислаётиб, узилиб қолган тўпиқ ва бармоқ суякларни кўриб қолади ва уларни ҳам бир целлофан халтага солган. Целлофандаги бўлакларни кўчага, чиқинди ташланадиган жойга олиб бориб қўйган.

Томига яширган ўғлининг жасади бир кун уни ошкор қилишидан чўчиган эркак 2020 йил 14 февраль куни ярим тунда уни қўшнининг томига олиб чиқиб яширган. 21 февраль куни қўшни томидан топилган жасад эса жиноятни фош этади.

Таъкидланишича, суд қотилни узоқ муддатга озодликдан маҳрум қилган.

Аввалроқ Жиззахда хотинини хиёнат қилишда айблаб, уни ўлдириб қўйган шахс 14 йилга қамалгани, Сирдарёда эркак уй-жой талашиб холаси ва унинг фарзандини ўлдириб, ёқиб юборгани, Тошкентда 5 ёшли ўғлини уриб ўлдирган спорт мураббийига суд ҳукми ўқилгани тўғрисида хабар берилганди.