Тошкент шаҳрида 2021 йилнинг 15—16 июль кунлари бўлиб ўтадиган «Марказий ва Жанубий Осиё: минтақавий ўзаро боғлиқлик. Таҳдид ва имкониятлар» мавзусидаги халқаро конференцияда иштирок этиш учун Ўзбекистонга келган Туркия ташқи ишлар вазири Мевлут Чавушўғлу ўз сафарини Фарғонадан бошлади. Бу ҳақда «Дарё» мухбири хабар бермоқда.
Мевлут Чавушўғлуни Фарғона халқаро аэропортида маданият вазири Озодбек Назарбеков, туризм ва спорт вазирининг биринчи ўринбосари Улуғбек Азамов, Фарғона вилояти ҳокимининг ўринбосари Иқболжон Эргашев кутиб олди.
Ташриф давомида меҳмонларга Ўзбекистоннинг Туркиядаги фавқулодда ва мухтор элчиси Алишер Аъзамхўжаев ҳамда Туркиянинг Ўзбекистондаги фавқулодда ва мухтор элчиси Олган Бекар ҳамроҳлик қилди.
Туркия ташқи ишлар вазири Марғилондаги Ҳунармандлар марказини бориб кўрди. Меҳмонлар марказнинг тўқув цехида бўлиб, турфа рангда товланувчи ипакдан атлас, адрас, шойи, бахмал, беқасам матолар тўқиш жараёни билан танишди.
Меҳмонлар марказда қўл меҳнати асосида тайёрланган нақшинкор ипак гиламлар Туркияда ҳам анча машҳур эканини алоҳида қайд этди.
Мевлут Чавушўғлу Олтиариқ туманидаги узум боғларида бўлди. Пайкаллардан қовун ва тарвуз узиб, уларни татиб кўрди.
Туркия ташқи ишлар вазири Қўқон шаҳрида бўлиб, вилоятдаги илк хусусий олий ўқув юрти — Қўқон университети фаолияти билан танишди.
Меҳмонлар шарафига ўзбек-турк миллий маданий маркази қошидаги «Ахска йилдизлари» болалар ансамбли томонидан туркча куй-қўшиқлар ва рақслар ижро этилди.
Мавлут Чавушўғлу Қўқон университетининг фахрий меҳмонлар китобига самимий тилакларини ёзиб қолдирди:
«Тарихий Қўқон, дея ном олиб келган бу мўъжаз шаҳарнинг илм марказида ва қадим бир маданиятга мезбонлик қилган ота тупроқларда эканлигимдан катта бахт ва ҳаяжон ҳис қиляпман. Бугунги кун ва келажак орасида алоқа ўрнатаётган Қўқон университетининг ўқитувчиларига ҳамда бу ерда таҳсил олаётган фарзандларимизга омадлар тилайман!
Ўзбекистонлик қардошларимиз муваффақиятларидан ғурур-ифтихор ҳис этяпман. Бу университетда Ўзбекистон учун кўплаб муваффақиятларга асос солинишига умид қиламан».
Кейинги манзил шаҳардаги машҳур Ўрда майдони ва Худоёрхон саройи бўлди. Бу ердаги тарихий экспонатлар меҳмонлар эътиборини тортди.
Жоме мажмуасига ташриф давомида Туркия ташқи ишлар вазири Қўқон ҳолвасининг тайёрланиш жараёнига гувоҳ бўлди. Қўқон шаҳрининг бой тарихи, маданияти ва ҳунармандчилиги билан танишди.
Шу куннинг ўзида Мевлут Чавушўғлу Фарғонага ташрифини якунлаб, Тошкентга учиб кетди.
Мавзуга доир: Туркия ташқи ишлар вазири 14 июль куни Фарғонага келади
Изоҳ (0)