Москвадаги оммавий муштлашув Тожикистон ва Қирғизистон фуқаролари ўртасида юз берган. Улар Россиядан депортация қилинади

Москванинг «Кузминки» метро бекати яқинида 180 дан ортиқ киши иштирокида содир этилган оммавий муштлашув Тожикистон ва Қирғизистон фуқаролари ўртасида келиб чиққан. Бу ҳақда «РЕН ТВ» телеканали хабар берди.

Телеканал маълумотларига кўра, ушбу муштлашувдан аввал Москвада меҳнат муҳожирлари ўртасида икки марта тўқнашув бўлиб ўтган. Хусусан, воқеадан сал олдин Подмоскведаги Химки шаҳрида жанжал келиб чиққан. У ерда Тожикистон фуқаролари Марказий Осиё республикаларидан келган бир неча кишини калтаклаган. Кейинчалик 11 июль куни яна бир можаро юз берган, унда Тожикистондан келган муҳожирлар Қирғизистоннинг уч нафар фуқаросини калтаклаган. Учаласи ҳам касалхонага ётқизилган.

Ўз навбатида Бутунроссия Қирғизистон Конгрессининг Москва ҳудуди бўлими раҳбари Марсель Салахунов «Кузминки» яқинидаги оммавий муштлашувдан олдин яна бир можаро содир этилганини тасдиқлади.

Унинг таъкидлашича, можаро соф маиший хусусиятга эга бўлган. Йигитлар бильярд ўйнаб, бир-бири билан ниманидир келиша олмаган.

Салахуновнинг қўшимча қилишича, қирғиз ва тожик диаспоралари вакиллари республикалар аҳолисини тинчлик сақлашга чақирувчи қўшма баёнот беришни режалаштирмоқда.

Дастлаб жанжал Ўзбекистон ва Қирғизистон фуқаролари ўртасида чиққани айтилганди. Ўзбекистон Ташқи миграция агентлиги Россия Ички ишлар вазирлиги ходимлари билан мулоқотда бўлиб, вазиятни ўрганди ва можарода ўзбекистонликлар иштирок этмаганини маълум қилди.

Россия Ички ишлар вазирлигининг Москвадаги бош бошқармаси хабар беришича, «Кузминки» метроси яқинидаги жанжал иштирокчилари суд қарори билан Россиядан чиқариб юборилади.

«Ушбу чет эл фуқароларига суд қарори билан маъмурий жарима солиш билан бирга улар Россия Федерацияси ҳудудидан чиқариб юборилади. Шунингдек, бир қатор шахсларга нисбатан Россия Федерацияси ҳудудига киришга рухсат бермаслик тўғрисида қарор қабул қилинади», — дейилади хабарда.

Хабарда қайд этилишича, жанжалдан сўнг можарода қатнашган 103 киши ҳудудий полиция бўлимларига олиб кетилган. Ҳибсга олинганларга нисбатан Россияда бўлиш режимининг бузилиши, майда безорилик, йиғилиш, митинг, намойиш, юриш ёки пикет ташкил этиш ёки ўтказиш тартибининг бузилиши сабаблари билан баённомалар тузилган.

Шунингдек, муштлашувдан сўнг полиция Россия Жиноят кодексининг 213-моддаси (безорилик) бўйича жиноий иш қўзғаган. Ушбу модда бўйича жиноят 1 миллион рубль (143, 4 миллион сўм)гача жарима ёки беш йилгача мажбурий меҳнат ёки етти йилгача озодликдан маҳрум қилиш билан жазоланади.

«Ҳозирда полиция ходимлари воқеанинг барча тафсилотларини аниқлаш учун текширув ўтказмоқда. Унинг натижалари бўйича қонун ҳужжатларига мувофиқ қарор қабул қилинади», — дейилади хабарда.