Ўзбекистонга «Спутник V» вакцинасининг 90 минг дозалик компонентлари олиб келинди

15 июль куни Ўзбекистонга Россиядан «Спутник V» вакцинасининг 70 минг дозалик 1-компоненти, 20 минг дозалик 2-компоненти олиб келинди, деб хабар беради Соғлиқни сақлаш вазирлиги матбуот хизмати.

Маълумот учун, 1 июнь куни «Спутник V» вакцинасининг навбатдаги 70 минг дозали 1-компоненти, 10 июнда 70 минг дозали 2-компоненти апрель ойида эса ушбу вакцинанинг 100 минг дозаси келтирилганди (унинг 50 минг дозаси 1-компонент, 50 минг дозаси 2-компонент). 5 июлда эса мазкур вакцинанинг яна 40 минг дозали 1-компоненти олиб келинганди.

Шундай қилиб, мамлакатдаги «Спутник V» вакцинаси захираси 370 минг дозага етди.

Ўзбекистонда жами вакцина захираси 7 миллион 530 минг дозани ташкил қилмоқда. Улардан 660 минг дозаси AstraZeneca, 6,5 миллион дозаси ZF-UZ-VAC2001 вакцинасидир.

Эслатиб ўтамиз, Ўзбекистон фуқароларини «Спутник V» вакцинаси билан эмлаш апрель ойи охирларидан бошланган эди. Ўзбекистонга аҳолини эмлаш учун олиб келинаётган «Спутник V»нинг ярмини тадбиркор Алишер Усмонов молиялаштирган. Ушбу вакцинадан жами 1 миллион доза сотиб олиш кўзда тутилган.