Ўзбекистонлик машҳур спорт журналисти, ёзувчи, тарихчи ва жаз ижрочиси Владимир Сафаров 14 июль куни ҳаётдан кўз юмди. Бу ҳақда журналист Дмитрий Попов ва бошқа бир қатор манбалар маълум қилди.
Ўзбек спорти журналистикасида муҳим ўрин эгаллаган Владимир Сафаров 1939 йилнинг 17 январида Тошкент шаҳрида туғилган. Сафаров Ўзбекистон футболига оид кўплаб илмий, статистик ва тарихий китоблар муаллифи ҳисобланади. Шунингдек, у мусиқанинг жаз йўналишида фаолият олиб борган.
Унинг «Пахтакор» клуби тарихи, 1979 йилги авиаҳалокатга доир ва ўзбек футболи афсоналари ҳақидаги китоблар ўқувчилар орасида машҳур. Журналист фаолияти давомида 3 мингдан ортиқ мақолага муаллифлик қилган. Владимир Сафаров 1992 йилда Ўзбекистон футболида Геннадий Красницкий номидаги тўпурарлар клубини ташкил этилишида жонбозлик кўрсатган. Ундан Ўзбекистон футболида 100 ва ундан ортиқ гол урган футболчилар ўрин олади.
Сафаров 2000 йилда Ўзбекистон футбол федерацияси (ассоциация) томонидан йилнинг энг яхши журналисти деб топилганди.
Изоҳ (0)