Ўзбекистон ташқи ишлар вазири Абдулазиз Комилов бошчилигидаги делегация 13—14 июль кунлари Шанҳай ҳамкорлик ташкилоти (ШҲТ)га аъзо давлатлар Ташқи ишлар вазирлари кенгашининг Душанбе шаҳрида бўлиб ўтган навбатдаги йиғилишида иштирок этди, деб хабар бермоқда ТИВ матбуот хизмати.
Қайд этилишича, Ҳиндистон, Покистон, Қирғизистон, Қозоғистон, Россия, Хитой, Тожикистон ва Ўзбекистон ташқи сиёсий идоралари раҳбарлари ШҲТ бош котиби ва ШҲТ Минтақавий аксилтеррор тузилмаси ижроия қўмитаси директори иштирокида ташкилотнинг бўлажак юбилей саммитига тайёргарлик жараёнини муҳокама қилди.
Вазирлар ШҲТга аъзо давлатлар раҳбарлари кенгаши йиғилиши кун тартиби лойиҳасини ва мажлисида имзолаш учун таклиф қилинган ҳужжатларни кўриб чиқди. Сўнгги 20 йил ичида ШҲТ нуфузли халқаро тузилишга айланиб, замонавий давлатлараро алоқалар тизимини мустаҳкамлашда муносиб иштирок этаётгани алоҳида таъкидланди.
Ташкилот фаолиятини, шу жумладан, ШҲТ Минтақавий аксилтеррор тузилмасини янада кенгайтириш ва ривожлантириш бўйича фикр алмашилди. Шунингдек, халқаро ва минтақавий характердаги долзарб масалалар муҳокама қилинди. Делегациялар раҳбарларини Тожикистон президенти Эмомали Раҳмон ҳам қабул қилди.
Учрашувда 2021 йилнинг сентябрь ойида бўлиб ўтадиган ШҲТнинг Душанбе саммити якунлари бўйича Ташкилотга раислик Ўзбекистон томонига ўтиши муносабати билан Абдулазиз Комилов ШҲТга аъзо давлатлар Ташқи ишлар вазирлари кенгаши номидан нутқ сўзлади.
Вазир ўз нутқида ўзаро алоқаларни ривожлантириш ва мустаҳкамлашнинг долзарб жиҳатларини, ШҲТга аъзо давлатларнинг кўп томонлама ҳамда икки томонлама шаклдаги ҳамкорлик ва шериклик жараёнида эришилган улкан ижобий ютуқларни қайд этди.
Бундан аввал Абдулазиз Комилов Душанбеда Покистон, Афғонистон ва Ҳиндистон ташқи ишлар вазирлари билан учрашгани ҳақида хабар берилган эди.
Изоҳ (0)