БМТ: Афғонистон гуманитар фалокатга яқинлашмоқда

Афғонистон гуманитар фалокатга яқинлашмоқда, чунки мамлакатдаги зиддиятнинг кучайиши одамларнинг азият чекиши ва кўчиб кетиши ҳолатларининг кўпайишига олиб келади. Бу ҳақда Бирлашган Миллатлар Ташкилотининг қочқинлар иши бўйича Олий комиссари бошқармаси огоҳлантирди, деб ёзмоқда «Gazeta.uz».

БМТ қочқинлар иши бўйича комиссиясининг ҳисоб-китобларига кўра, 2021 йил январидан буён асосан хавфсизлик ва зўравонлик сабаблари билан 270 минг афғонистонлик мамлакат ичида бошқа манзилга кўчирилган. Ички кўчирилганларнинг умумий сони 3,5 миллиондан ошган.

«Сўнгги ҳафталарда уйларини ташлаб кетишга мажбур бўлган оилалар, кўчишнинг асосий сабаби сифатида хавфсизлик ҳолатининг ёмонлашувини кўрсатмоқда», — деди БМТ қочқинлар иши бўйича олий комиссари.

Комиссияда таъкидланишича, кўчирилган одамлар нодавлат қуролли гуруҳлар томонидан товламачилик ҳолатлари ва катта йўлларга қўлбола портловчи мосламалар ўрнатилгани тўғрисида хабар берган.

БМТнинг Афғонистондаги ёрдам миссияси маълумотларига кўра, 2021 йилнинг биринчи чорагида тинч аҳоли ўртасида қурбонлар сони 2020 йилга нисбатан 29 фоизга ошган. Улар орасида аёллар ва болалар улуши тобора кўпайиб бормоқда.

«Узоқ давом этган можаролар, кўплаб кўчишлар, COVID-19 пандемияси, такрорланадиган табиий офатлар, шу жумладан, қурғоқчилик ва қашшоқликнинг чуқурлашиши билан афғон халқининг бардоши ўз чегарасига етиб келди. Афғонистонда тинчлик келишувига ва ҳозирги зўравонликни тўхтатишга эришилмас экан, аҳолининг мамлакат ичкарисида, шунингдек, қўшни давлатлар ва ундан ҳам узоққа кўчиши тобора кўпроқ давом этади», — дейилади хабарда.

5 июль куни Европа Иттифоқи очликка қарши кураш учун Афғонистонга 25 миллион евролик шошилинч гуманитар ёрдам ажратишини эълон қилганди. Прогнозларга кўра, 2021 йилда Афғонистон аҳолисининг ярми озиқ-овқат ва сувнинг кескин танқислигидан азият чекади. Қурғоқчилик натижасида камида 11 миллион киши озиқ-овқат инқирозига учраган ва 3,2 миллион киши озиқ-овқат билан боғлиқ фавқулодда вазиятда.

Янги маблағ Евроиттифоқ томонидан Афғонистонга инсонпарварлик ёрдами сифатида 2021 йил учун ажратилган 32 миллион еврога қўшимча бўлади.

Эслатиб ўтамиз, 11 июнь куни Ўзбекистон Афғонистонга 1000 дона кислород баллонларидан иборат гуманитар ёрдамни топширган эди.