Қозоғистонда 2021 йилги Қурбон ҳайитини нишонлаш ва қурбонлик қилиш маросими онлайн тарзда бўлиб ўтади. Бу ҳақда Олмаота шаҳар бош санитария шифокори Жандарбек Бекшин маълум қилди, деб ёзмоқда “Zakon.kz”.
Қурбон ҳайитини нишонлаш 20 июлга тўғри келади, дейилади хабарда. Оммавий тадбирларни ўтказиш бўйича ўрнатилган чекловлар туфайли ўша куни Қозоғистонда масжидлар ёпиқ бўлади, аммо Қурбон ҳайити нишонланади. Мусулмонлар диний идораси қурбонлик маросимини иложи борича хавфсиз ўтказишга ҳаракат қилмоқда.
«2020 йили биринчи марта Қурбон ҳайитини онлайн режимда ўтказгандик. Ўтган йилги тажриба шуни кўрсатдики, садақа ва Қурбон Шалу (қурбонлик маросими)ни ҳам онлайн тарзда амалга ошириш мумкин. Садақа учун, шунингдек, Қурбон Шалуни ташкил этиш учун маблағлар Қурбон-2021 веб-сайти орқали қабул қилинади. Қурбонликка аталган ҳайвонлар Олмаота вилоятининг Қорасой туманидаги махсус ажратилган майдонда сўйилади», — деди Жандарбек Бекшин.
«Интерфакс» хабар беришича, пандемия туфайли Москвада ҳам 2021 йилги Қурбон ҳайити онлайн тарзда нишонланади, шаҳар масжидлари диндорлар учун ёпиқ бўлади. Россия Мусулмонлари диний идораси уламолар кенгаши шундай қарор қабул қилган.
«Москвада байрам намози фақат Жоме масжидида имомлар, муаззинлар ва муфтий ўринбосарлар иштирокида ўқилади. Бошқа масжидларда, шунингдек, мусулмонларнинг маҳаллий диний ташкилотларида байрам намозини ўқиш тавсия этилмайди. Барча мусулмонлар байрамона муҳитни ўз уйларида, оилалари билан яратиши лозим», — дейилади муфтият веб-сайтида.
Мусулмонлар идораси таркибига кирувчи ҳудудий диний бошқармалар ҳайит намозини ўқиш тартибини жойлардаги эпидемиологик вазиятни ҳисобга олган ҳолда мустақил ҳал қилади.
Коронавирус тарқалишига йўл қўймаслик мақсадида Москва ҳукумати Рамазон ҳайити куни ҳам асосий масжидларда ҳайит намози учун тўпланишни тақиқлаган эди.
Изоҳ (0)