Гаити ҳукумати ўз қароргоҳида отиб ўлдирилган мамлакат президенти Жовенел Моизга қарши операцияни тайёрлашда марказий шахс бўлиши мумкин бўлган одамни ҳибсга олди. Бу ҳақда Constant Haiti’га таяниб, «РБК» хабар берди.
Ҳибсга олинган шахс — келиб чиқиши гаитилик бўлган шифокор Кристиан Эммануэль Санон. Шу билан бирга, у кўп вақтини Флорида штатида ўтказади, дейилади хабарда.
Гаити миллий полицияси раҳбари Леон Шарлнинг сўзларига кўра, Санон ўлдириш операциясини уюштиришда муҳим роль ўйнаган. «У июнь ойида сиёсий мақсадда хусусий самолёт билан учиб келган ва ушбу қотилликни амалга оширган одамларни ёллаш учун хусусий хавфсизлик фирмасига мурожаат қилган»— деди Шарл.
Унинг аниқлик киритишича, ушбу хусусий хавфсизлик компанияси полиция фикрига кўра, Венесуэланинг асоси АҚШда жойлашган CTU компанияси бўлган.
Давлат раҳбарининг ўлдирилиши билан боғлиқ иш бўйича 17 нафардан ортиқ гумонланувчи ҳибсга олинган, улар орасида келиб чиқиши гаитилик бўлган АҚШнинг икки фуқароси ҳам бор.
Расмийлар ушбу тўда 28 кишидан иборатлигини, улар асосан колумбияликлар эканини даъво қилди. Ҳибсга олинган икки АҚШ фуқароси гуруҳнинг қолган қисми учун таржимонлик қилганини айтди. Уларнинг сўзларига кўра, ҳужумчилар президентни ўлдиришни эмас, балки ҳибсга олишни мўлжаллаган.
Жовенел Моиз Гаити пойтахти Порт-о-Пренсдаги қароргоҳида 7 июлга ўтар кечаси ўлдирилди. Президент ўлдирилиши олдидан қийноққа солингани маълум бўлди. Унинг рафиқаси ўқотар қуролдан яраланиб, дастлаб маҳаллий касалхонага етказилди, сўнг даволаниш учун АҚШга юборилди.
Гаити ҳукумати президентни ўлдиришда гумонланиб, 15 нафар колумбиялик ва икки нафар америкалик қўлга олинганини маълум қилди. Яна икки гумонланувчи (улар ҳам Колумбия фуқаролари) полициячилар билан отишмада ўлдирилди. Суиқасднинг иштирокчилари деб тахмин этилаётган яна бир неча киши қочиб кетишга муваффақ бўлди.
Президентнинг ўлдирилиши муносабати билан Гаити ҳукумати АҚШга мурожаат қилиб, мамлакатга инфратузилманинг жуда муҳим объектларини ҳимоя қилиш учун чекланган қўшинлар контингентини юборишни сўради.
Гаитининг маҳаллий Juno7 нашри хабарига кўра, президентнинг ўлдирилиши фонида юзага келган сиёсий инқирозни тартибга солиш учун АҚШ Гаитига ўзининг катта делегациясини юборади.
Мавзуга доир:
- Гаити президенти ўлдирилди. Мамлакатда ҳарбий ҳолат эълон қилинди. Қотилликда гумонланувчилар қўлга олинди
- Гаити президентини ўлдиришда Колумбия ва АҚШ фуқаролари айбланмоқда
- Гаити президенти ўлдирилиши олдидан қийноққа солингани маълум бўлди. АҚШ сиёсий инқирозни тартибга солиш учун Гаитига ўз делегациясини юборади
Изоҳ (0)