Германия канцлери Ангела Меркель 14—16 июль кунлари АҚШга ташрифи чоғида Жонс Ҳопкинс университетининг фахрий докторлик унвонини олади. Бу ҳақда Германия Вазирлар Маҳкамаси вакили Штеффен Зайбертга таяниб «РИА Новости» хабар берди.

Фото: «РИА Новости»

«Канцлер Вашингтондаги тантанали маросимда Жонс Ҳопкинс университетининг фахрий докторлик унвонини олади», — деди Штеффен. Унинг қўшимча қилишича, бу Меркелнинг 18-илмий даражаси бўлади.

Қайд этилишича, Вашингтонда АҚШ президенти Жо Байден билан музокаралар ва икки мамлакат раҳбарларининг қўшма матбуот анжуманидан сўнг, 15 июль куни АҚШ Меркель ва унинг турмуш ўртоғи Йоахим Зауэр учун кечки овқат ташкил қилади.

Аввалроқ Ангела Меркель Россия билан рақобатда Германияга ёрдами учун АҚШга миннатдорлик билдирган эди.

Эслатиб ўтамиз, 2021 йил арафасида Ангела Меркель канцлер сифатида Германия халқига сўнгги марта Янги йил мурожаатини йўллаганди. Меркель 2021 йилнинг сентябрь ойидаги сайловларда қатнашмаслиги ва сиёсатдан нафақага чиқиш ниятини яна бир бор тасдиқлаган.