Сурхондарё вилоятида ЙПХ ходимлари томонидан меъёрдан ортиқ йўловчи билан ҳаракатланган «Волга» тўхтатилди. Бу ҳақда ЙҲХББ хабар қилди.
Аниқланишича, машинада жами 21 киши кетаётган бўлган.
«Нима бу микроавтобусми? Жонларингиз ўзингизга қизиқ эмасми?», – дейди ЙПХ ходими эътироз билдирган йўловчига қарата.
Қайд этилишича, ушбу қоидабузарликка йўл қўйган ҳайдовчига тегишли тартибда чора кўрилган.
Бундай қоидабузарлик Сурхондарё вилоятида илк бор аниқланмаяпти. Ушбу вилоятда бундан аввал ҳам бир неча бор меъёридан ортиқ йўловчи ташиш ҳолатлари аниқланган.
Хусусан, Узун туманида ҳайдовчи «Жигули»да 16 нафар фуқарони олиб кетаётгани аниқлангани, 21 кишини автомобиль юкхонасида олиб кетаётган ҳайдовчи жаримага тортилгани ҳамда Сариосиё туманида Damas’да 16 нафар йўловчи олиб кетилаётгани аниқлангани ҳақида хабар берилганди.
Изоҳ (0)