Бухоро архитектура ва қурилиш коллежида «Россия темир йўллари» компаниясининг «РЖДстрой» шўъба корхонаси талабига асосан, ошпазлик, ҳайдовчилик ва қурилишнинг қатор йўналишлари бўйича ишлаш истагида бўлган фуқаролар учун танлов ўтказилмоқда. Бу ҳақда Ташқи меҳнат миграцияси агентлиги хабар берди.
Танловда иштирок этган талабгорлар, касб-ҳунар ўрганаётганлардан ташқари, яна 200 дан ортиқ ҳаваскор ёшларга яхшигина ойлик маош таклиф этаётган буюртмачи корхона вакили томонидан иш ва меҳнатга ҳақ тўлаш тартиби, яшаш ҳамда иш шароитлари, ҳужжатларни расмийлаштириш ҳақида батафсил маълумот берилади.
Танловдан олдин Россиянинг «РЖДстрой» компанияси департаменти бошлиғи Светлана Муравёва Бухоро вилояти ҳокимлигида бўлиб, вилоят ҳокимининг биринчи ўринбосари Нозимжон Холмуродов билан учрашган.
Учрашувда вилоятда ўтказилаётган танловда иш берувчилар томонидан танлаб олинган фуқароларни хорижга жўнатишдан олдин комплекс тиббий кўрикдан ўтказиш, янгича муҳитга кўниктириш – адаптация жараёнидан ўтказиш, хавфсиз ва кафолатланган иш билан таъминлаш масаласи муҳокама қилинган.
Светлана Муравёва «РЖДстрой» компаниясининг 14 ва 15-қурилиш-монтаж трестлари, «Монолит», «Некст», «Восточний портал», «Р-Восток» масъулияти чекланган жамиятларида иш кучи ҳар қачонгидан ҳам муҳим эканини алоҳида таъкидлаб ўтган.
«РЖДстрой» ОАЖ — бу Калининграддан Жанубий Сахалингача бутун Россия бўйлаб пудрат ишларини олиб борадиган федерал қурилиш ва саноат корхонаси ҳисобланади. Компания таркибига 16 та қурилиш-монтаж трести, линияли корхоналарни бошқарувчи — қурилиш-монтаж поездлари ва қурилиш майдончалари ҳамда 3 та ихтисослаштирилган филиал киради.
Изоҳ (0)