Telegram мессенжерида Қаршидаги рейдда ҳушини йўқотгани айтилган фуқаро ЙПХ ходимини тепгани, ИИБ ходимлари бунга жавобан уни бўғиб олгани тасвирланган видео тарқалди. Мазкур тасвирлар воқеа жойидаги кузатув камераларига муҳрланган.
Видеотасвирлардан англашилишича, Nexia-2 автомобили эвакуаторга ортилаётган пайтда йўлнинг нариги томонидан югуриб келган фуқаро эвакуатор ёнида турган ЙПХ ходимини тепиб, унга ташланган. Бунга жавобан ИИБ ходимлари биргалашиб, фуқарони бўғиб олган.«Дарё»да эълон қилинган дастлабки видеотасвирда Қаршидаги рейдда ҳайдовчининг тоби қочгани, воқеа гувоҳлари эса ҳайдовчи ЙПХ ходимлари томонидан калтакланганини айтган эди. Мазкур воқеага изоҳ берган Ички ишлар вазирлиги ҳолат 2021 йилнинг 5 июль куни Қарши шаҳар А.Темур кўчасида педагогика коллежи рўпарасидаги пиёдалар йўлакчаси устида тўхтаб турган ҳайдовчи О.О. билан юз берганини, ҳайдовчининг қоидабузарлиги тегишли тартибда расмийлаштирилаётганда унинг хотини ва ўғли жанжал кўтариб, атрофдагиларнинг эътиборини жалб қилгани ҳақида хабар берганди.
Вазирлик ахборот хизмати раҳбари Шоҳруҳ Ғиёсов Nexia ҳайдовчиси пиёдалар йўлакчаси устида тўхтаб туриб, ҳаракатга халал берганини, шу сабаб унга маъмурий баённома расмийлаштиришга қарор қилинганини қўшимча қилганди.
Изоҳ (0)