«Юқоридан пастга қараб» – Акмал Бурҳонов Президент ва бош вазир ҳам йил давомида топган даромадини декларациялаши режалаштирилаётганини айтди

АОКАда 9 июль, жума куни Коррупцияга қарши муросасиз муҳит яратиш, давлат ва жамият бошқарувида коррупциявий омилларни кескин камайтиришга қаратилган Президент фармони ва қарори мазмун-моҳияти ҳамда аҳамиятига бағишланган матбуот анжумани ўтказилди. Унда қатор вазирлик ва идоралар раҳбарияти журналистларнинг саволларига жавоб қайтарди. Бу ҳақда «Дарё» мухбири хабар бермоқда.

Коррупцияга қарши курашиш агентлиги директори Акмал Бурҳоновнинг айтишича, Ўзбекистон Президенти ва ҳукумат раҳбарининг ҳам йил давомида топган пули бўйича ҳисобот топшириши йўлга қўйилиши режалаштирилаётганини қайд этди.

«Давлат хизматчиларининг мол-мулк ва даромадларини декларациялаш тўғрисида»ги қонун лойиҳасида давлат ҳокимияти ва бошқарув органларининг энг юқори турувчи раҳбаридан тортиб, энг қуйи поғонагача бўлган — туман даражасидаги оддий ходимигача мажбурий декларациялаш тизимига ўтилади. Бу босқичма-босқич амалга оширилади. Лекин биринчи босқичдаёқ, албатта, «энг юқоридан бошлаб, энг пастга қараб» принципи жорий қилинади. Яъни бунга ҳукумат раҳбари, керак бўлса, давлат раҳбари ҳам киритилади. Бу жамоатчилик муҳокамасига қўйилади ва муҳокама қилинади.

Қонунга парламент раҳбарлари ва аъзолари ҳам, ҳуқуқни муҳофаза қилиш идоралари раҳбарлари ва ходимлари ҳам киритилиши режалаштириляпти. Декларация топширувчиларнинг аниқ тоифалари, аниқ рўйхати шакллантирилади», — деди Бурҳонов.

Эслатиб ўтамиз, Коррупцияга қарши курашиш агентлиги амалдорларнинг даромадлари декларация қилинишини назарда тутувчи қонун лойиҳасини ишлаб чиққан эди. Агентлик масъул ходими қонун лойиҳасида мансабдор шахсларнинг барчаси қамраб олингани ҳақида сўз юритиб, қуйидаги мансабдор шахалар доираси қамраб олинганини айтганди. Булар:

• Президент Администрацияси;
• Вазирлар Маҳкамаси;
• Республика ташкилотлари;
• Ҳокимликлар;
• Ҳуқуқни муҳофаза қилувчи органлар;
• Суд идоралари ходимлари.

Қонун лойиҳаси 2021 йил 25 март куни Ўзбекистон Президенти Администрациясига киритилди.