Telegram messenjerida Qarshidagi reydda hushini yo‘qotgani aytilgan fuqaro YPX xodimini tepgani, IIB xodimlari bunga javoban uni bo‘g‘ib olgani tasvirlangan video tarqaldi. Mazkur tasvirlar voqea joyidagi kuzatuv kameralariga muhrlangan.
Videotasvirlardan anglashilishicha, Nexia-2 avtomobili evakuatorga ortilayotgan paytda yo‘lning narigi tomonidan yugurib kelgan fuqaro evakuator yonida turgan YPX xodimini tepib, unga tashlangan. Bunga javoban IIB xodimlari birgalashib, fuqaroni bo‘g‘ib olgan.“Daryo”da e’lon qilingan dastlabki videotasvirda Qarshidagi reydda haydovchining tobi qochgani, voqea guvohlari esa haydovchi YPX xodimlari tomonidan kaltaklanganini aytgan edi. Mazkur voqeaga izoh bergan Ichki ishlar vazirligi holat 2021-yilning 5-iyul kuni Qarshi shahar A.Temur ko‘chasida pedagogika kolleji ro‘parasidagi piyodalar yo‘lakchasi ustida to‘xtab turgan haydovchi O.O. bilan yuz berganini, haydovchining qoidabuzarligi tegishli tartibda rasmiylashtirilayotganda uning xotini va o‘g‘li janjal ko‘tarib, atrofdagilarning e’tiborini jalb qilgani haqida xabar bergandi.
Vazirlik axborot xizmati rahbari Shohruh G‘iyosov Nexia haydovchisi piyodalar yo‘lakchasi ustida to‘xtab turib, harakatga xalal berganini, shu sabab unga ma’muriy bayonnoma rasmiylashtirishga qaror qilinganini qo‘shimcha qilgandi.
Izoh (0)