Самарқанд вилоятининг Пастдарғом туманида 11-синф ўқувчиси ўз жонига қасд қилиб, вафот этди. Бу ҳақдаги хабарни тасдиқлаган Бош прокуратура ахборот хизмати раҳбари Ҳаёт Шамсутдинов воқеа салкам икки ой илгари содир бўлганини, воқеа ҳақида прокуратурага хабар бермаган мансабдорларга хизмат текшируви тайинланганини билдирди.
Ҳаёт Шамсутдиновга кўра, Пастдарғом туманининг «Янгиобод» маҳалласи Оҳунбобоев кўчасида яшаган, тумандаги 23-сонли умумий ўрта таълим мактабининг 11-синф ўқувчиси Х.Ж. 2021 йил 15 май куни соат тахминан 03:00 да хонадонидаги молхона болорига арқон билан бўйин соҳасидан ўзини осиб, жонига қасд қилган.«Ҳодиса содир этилганидан сўнг марҳумнинг мурдаси қариндошлари томонидан ипдан ечиб олиниб, унинг вафот этганига ишонч ҳосил қилинган ва ҳодиса ҳақида ҳуқуқни муҳофаза қилувчи органларга хабар қилинмасдан шу куни тахминан соат 14:00 да маҳаллий урф-одатлар ўтказилиб, тумандаги ‘Шароф Рашидов’ маҳалласида жойлашган ‘Қурилиш’ номли қабристонга дафн этилган», — дейилади Бош прокуратура ахборот хизмати тақдим этган маълумотда.
Қайд этилишича, мазкур ҳолат бўйича туман прокуратураси масъуллари 2021 йилнинг 7 июль куни воқеа жойини кўздан кечирган. Ҳамда ҳодиса ҳақида ҳуқуқни муҳофаза қилувчи органларга ўз вақтида мурожаат этмагани юзасидан туман Халқ таълими бўлими, туман Ободонлаштириш бошқармаси, туман Оила ва маҳаллани қўллаб қувватлаш бўлими ва туман ИИБга хизмат текширувлари тайинланган.
Эслатиб ўтамиз, аввалроқ Қашқадарёда 11-синф ўқувчиси уйидаги молхонадан осилган ҳолда топилгани, Ангренда ИИБ ходими ўз жонига қасд қилгани хабар берилганди.
Изоҳ (0)