Ўзбекистон одам савдоси ва мажбурий меҳнатга қарши курашиш бўйича АҚШнинг 2021 йилги ҳисоботида 2-гуруҳ махсус кузатув рўйхатидан 2-кузатув рўйхатига кўтарилди.
2021 йилги ҳисоботда Ўзбекистон ҳукуматининг пахта йиғим-теримида мажбурий меҳнатнинг олдини олиш, мажбурий меҳнатга қарши қонунлар бузилишини аниқлаш ҳамда қонунбузарларни жавобгарликка тортишга оид саъй-ҳаракатлари эътироф этилган.
Қайд этилишича, 2020 йилда меҳнатни назорат қилиш, ҳуқуқни муҳофаза этиш ва фаолияти одам савдосига йўналтирилган фуқаролик жамияти институтлари кучайтирилган. Шунингдек, фуқаролар ҳам мажбурлашга қарши туриш ва турли ҳуқуқбузарликлар тўғрисида хабар бериш ҳуқуқларидан тобора бохабар бўлиб бормоқда.
«Шу каби муҳим янгиликлар Давлат департаментининг Ўзбекистон рейтингини кўтариш тўғрисидаги қарорига асос бўлди. Шунингдек, АҚШ мажбурий меҳнатга барҳам бериш ва одам савдосига қарши курашишда Ўзбекистоннинг содиқ ҳамкори бўлиб қолади», — дейилади хабарда.
Аввалроқ Cotton Campaign халқаро коалицияси ўзининг расмий веб-сайтида «Ўзбек пахтачилигида ўзгараётган манзара» сарлавҳали мақола чоп этиб, Ўзбекистон 2020 йилги пахта теримида мажбурий меҳнатга барҳам беришда «сезиларли ютуқлар»га эришганини маълум қилганди.
Маълумот учун, узоқ йиллар давомида пахта терими мавсумида болалар ва мажбурий меҳнатдан фойдаланилгани боис Ўзбекистон пахтаси халқаро жамоатчилик томонидан «қора рўйхатлар»га киритилган, етакчи ишлаб чиқарувчилар Ўзбекистон пахтасини бойкот қилган эди. Халқаро меҳнат ташкилотининг Вашингтондаги офиси директори Кевин Кассиди эса ўзбек пахтаси бойкотини асоссиз деб эълон қилганди.
Изоҳ (0)