Тошкентда украиналик самолёт ишлаб чиқарувчилар ва «Тошкент механика заводи» (TMZ) вакиллари ўртасида бўлиб ўтган музокаралар давомида авиасозлик соҳасида ҳамкорлик масалалари кўриб чиқилди, деб хабар беради завод матбуот хизмати.
Хусусан, учрашув давомида Ўзбекистонда ишлаб чиқарилган маҳсулотларни экспорт қилиш истиқболлари ва Украинанинг «Антонов» давлат корхонаси ҳамда бошқа саноат корхоналари билан саноат кооперациясини ташкил этиш орқали «Тошкент механика заводи» негизида замонавий самолётлар учун эҳтиёт қисмлар ва узеллар ишлаб чиқаришни кенгайтириш имкониятлари муҳокама қилинган.
Музокаралардан сўнг, украиналик меҳмонлар «Тошкент механика заводи» АЖнинг ишлаб чиқариш майдончасига ташриф буюриб, TMZ раҳбариятининг илгари фаолият кўрсатган самолёцозлик заводининг ноёб ишлаб чиқариш имкониятларини сақлаб қолиш борасидаги саъй-ҳаракатларини алоҳида эътироф этган.
Томонлар «Йўл харитаси» бўйича ва «Антонов» давлат корхонаси буюртмасига биноан Тошкент заводининг технологик салоҳиятини ҳамда самолёт қисмлари ва узелларини ишлаб чиқаришни ташкил этиш имкониятларини батафсил ўрганувчи мутахассислардан иборат ишчи гуруҳ тузишга келишиб олган.
Аввалроқ Ўзбекистон ва Россия самолёцозлик соҳасидаги қўшма лойиҳаларни муҳокама қилаётгани тўғрисида хабар берилганди.
Изоҳ (0)