Россия қурилиш майдонларидаги меҳнат муҳожирларини мажбурий эмлаш учун қурилиш компаниялари ёнидан кетадиган харажатлар уй-жой нархларининг ўсишига туртки бериши мумкин. Бу ҳақда «ВекторСтройФинанс» компаниясининг бошқарувчи ҳамкори Андрей Колочинский «Интерфакс»га айтиб ўтди.
«Бутун мамлакат бўйлаб қурилиш компанияларининг меҳнат муҳожирларини эмлашга сарфлайдиган харажатлари юз миллионлаб рублни ташкил қилади. Компаниялар молиявий йўқотишларни қандай қоплайди, деган саволга жавоб сиртда ётибди — квадрат метр нархини ошириш орқали», — дея таъкидлади эксперт.
Унинг фикрига кўра, меҳнат муҳожирларини бошқа фуқаролар билан тенг равишда бепул эмлаш нархлар динамикасини пасайтиришга ёрдам беради.
Эслатиб ўтамиз, Москвада меҳнат муҳожирларини коронавирусга қарши бир компонентли «Спутник Лайт» вакцинаси билан эмлаш бошланди. Россиядаги чет эллик ишчилар учун эмланиш пуллик. Меҳнат муҳожирлари 1300 рубль (190 минг сўм) эвазига коронавирусга қарши эмланиши мумкин. Вакцинация хизматлари учун иш берувчи пул тўлайди.
Давлат раҳбари Владимир Путин 15 июнгача меҳнат муҳожирларини коронавирусга қарши эмлашни ташкиллаштиришни буюрганди. Фармонга мувофиқ, биринчи бўлиб, аллақачон мамлакатда бўлиб турган меҳнат муҳожирлари ва чет эл фуқароларини эмлаш масалалари кўриб чиқилаётгани айтилди.
Бош вазир ўринбосари Марат Хуснуллин ҳукумат қурилиш соҳаси учун мамлакатга меҳнат муҳожирларини олиб киришнинг соддалаштирилган вариантини кўриб чиқаётганини маълум қилди. Меҳнат муҳожирларининг етишмаслиги ҳозирда Россиянинг қурилиш соҳасида асосий муаммо бўлиб қолмоқда.
Март ойининг бошида Россия Қурилиш вазирлиги мамлакат қурилиш майдонларига 1,2 миллионга яқин ишчи етишмаётганини маълум қилган. Ушбу муаммони ҳал қилиш мақсадида Қурилиш вазирлиги бўш ўринларни тўлдириш учун муҳожирларни олиб кириш механизмига ўзгартириш киритмоқда.
Шунингдек, маҳбусларни қурилиш майдонларига жалб қилиш имконияти ҳам кўриб чиқилмоқда. Хусусан, Москвада муҳожирлар ўрнига маҳбусларни қурилиш ишларига жалб қилиш бошлаб юборилган.
Изоҳ (0)