КХДР етакчиси Ким Чен Ин Корея Меҳнат партияси йиғилишида юқори лавозимли амалдорларни коронавирус тарқалишининг олдини олишда қобилиятсизлик ва масъулиятсизликда айблади. Бу ҳақда Корея Марказий телеграф агентлигига таяниб, «РБК» хабар берди.
Унинг сўзларига кўра, эпидемияга қарши кураш пайтида йўл қўйилган хатолар мамлакат ва унинг аҳолиси хавфсизлигига таҳдид соладиган ўзига хос «жиддий ҳодиса»га сабаб бўлди. У айнан қандай ҳодиса ҳақида гап кетаётганига аниқлик киритмади.
Шунингдек, Ким Чен Ин расмийларни «раҳбарлар орасида кенг тарқалган эскича фикрлаш» учун танқид қилди.
Reuters хабарига кўра, йиғилишда Шимолий Корея раҳбарияти сиёсий бюронинг бир нечта аъзолари, партия Марказий қўмитаси котиблари ва бир нечта давлат идоралари расмийлари алмаштирилишини эълон қилди. Бу Ким Чен Иннинг расмийлар пандемияга қарши курашиш бўйича масъулиятни қай даражада уддалаганидан норози экани билан боғлиқ ёки йўқлиги номаълум.
Пхенян мамлакатда коронавирус йўқлиги ҳақида бир неча бор хабар берган. Бироқ 2020 йил июль ойида Ким Чен Ин COVID-19 гумон қилинаётган биринчи ҳолатни эълон қилиб, Ишчилар партияси сиёсий бюросининг фавқулодда йиғилишини чақирганди.
Жаҳон соғлиқни сақлаш ташкилоти (ЖССТ)нинг 2021 йил июнь ойи охиридаги маълумотларидан келиб чиқадиган бўлсак, мамлакат шу пайтгача коронавирус юқтириш ёки инфекциядан ўлим ҳолатлари ҳақида ҳисобот бермаган.
2020 йил январь ойида КХДР қуруқлик, денгиз ва ҳаво чегараларини ёпди, шунингдек, мамлакат ичкарисида ҳаракатланишга жиддий чекловлар қўйди. Шимолий Кореянинг соғлиқни сақлаш тизимида COVID-19 эпидемиясини бартараф этиш учун зарур бўлган ресурслар, маблағ ва технологиялар етишмайди, деб ёзган Financial Times. Мамлакат ЖССТ COVAX механизми орқали вакциналардан фойдаланиш ҳуқуқига эга, аммо дори воситаларини етказиб берувчи хорижий кўмак ходимлари ва тиббиёт мутахассислари учун КХДРга кириш тақиқланган.
Аввалроқ Шимолий Кореяда коронавирус тарқалишига қарши кураш учун ўрнатилган қаттиқ чекловлар шароитида халқаро гуманитар ташкилотлар, хусусан, Жаҳон озиқ-овқат дастурининг сўнгги ходимлари мамлакатни тарк этишга мажбур бўлгани ҳақида хабар берилганди. Чекловлар туфайли КХДРда аллақачон 12 та элчихона ёпилган. Уларнинг ходимлари мамлакат ҳудудини тарк этган. Россия элчихонаси ходимлари уйга моторсиз темир йўл вагонлари билан қайтишга мажбур бўлган эди.
Изоҳ (0)