Rossiyada COVID-o‘limlar bo‘yicha kunlik rekord yangilandi, Turkiyaning 26 ta viloyatida “hindcha” shtamm tarqaldi. Koronaxabarlar

Jons Hopkins universiteti ma’lumotlariga ko‘ra, dunyo bo‘yicha koronavirusga chalinganlar soni 181 851 597 kishiga yetdi, shularning 3 938 885 nafari vafot etdi. Koronavirusga chalinish holatlarining ko‘pligi bo‘yicha AQSh (33,6 million), Hindiston (30,3 million), Braziliya (18,5 million), Fransiya (5,8 million) va Rossiya (5,4 million) eng oldinda bormoqda.

O‘tgan bir kecha-kunduzda Rossiyada 669 kishi koronavirusdan vafot etdi. Bu pandemiya boshidan buyon kuzatilgan yangi kunlik rekorddir. Bundan avvalgi rekord bir kun oldin qayd etilgan, o‘shanda 652 kishi vafot etgan edi.

30-iyun ertalab holatiga Rossiyada 21 042 kishida koronavirus aniqlandi, umumiy kasallanganlar soni esa 5 514 599 kishiga yetdi.

Eng ko‘p COVID-bemorlar Moskvada (bir kunda 5823 kishi), Podmoskovyeda (2583) va Peterburgda (1503) qayd etildi.

Jami 224 kishi delta shtammni yuqtirib olgan, shularning 134 nafari — Istanbulda. Turkiyada hozircha koronavirusning delta plyus varianti aniqlangani yo‘q.

So‘nggi vaqtlarda butun dunyoda delta shtammining keng tarqalishi kuzatilmoqda. U dastlab Hindistonda aniqlangan bo‘lib, xususan, yuqumlilik darajasining yuqoriligi bilan ajralib turadi.

Uning aytishicha, hozirda Rossiya Fanlar akademiyasi koronavirusning “hindcha” shtammini faol o‘rganmoqda. “Aytish mumkinki, bu shtamm ancha yuqumli, uning yuqumlilik koeffitsiyenti ‘uxancha’ shtammdan ancha kattaroq”, — dedi akademiya vitse-prezidenti.

Avvalroq Rossiya epidemiologiya ilmiy-tadqiqot instituti direktori o‘rinbosari Aleksandr Gorelov koronavirus ayni paytda yoshlar va o‘smirlar orasida faolroq tarqalayotgani, asosan, 14-29 yosh odamlarda ko‘proq qayd etilayotganini ma’lum qilib, bu “hindcha” shtammning tarqalishi natijasi ekanini aytgandi.