Россияда коронавируснинг дельта-плюс штаммини юқтириш бўйича биринчи ҳолат аниқланди. Бу ҳақда «Роспотребнадзор» раҳбари Анна Попова маълум қилди, деб ёзмоқда «РБК».
Аввалроқ Смородинцев грипп илмий-тадқиқот институти ушбу турдаги вирусни юқтирган биринчи бемор ҳақида хабар берган.
«Шунга аниқлик киритмоқчиманки, ўтган ҳафта хабар қилинган штамм ҳақидаги барча маълумотларни жуда эҳтиёткорлик билан текширдик. Маълумот тасдиқланди: бу ҳақиқатан ҳам дельта-плюс вариантидир. Ушбу касалликнинг енгил шаклини ўтказган аёл билан ҳаммаси яхши тугади. Аммо мен сизнинг эътиборингизни бугунги кунда оммавий вакцинацияни амалга ошириш жуда муҳим эканига қаратмоқчиман, » — деди Попова COVID-19 га қарши кураш бўйича Мувофиқлаштирувчи кенгаш президиуми йиғилишида.
Маълумот учун дельта-плюс коронавирус «ҳиндча» (дельта) штаммининг янги тури. Мутахассислар фикрига кўра, дельта-плюс ўта юқумли бўлиб, ҳатто унинг ташувчиси ёнидан ниқобсиз ўтиб кетиш ҳам хавфли.
Гамалея номидаги эпидемиология ва микробиология илмий-тадқиқот маркази директори Александр Гинцбургнинг маълум қилишича, Россияда коронавирусга чалиниш бўйича аниқланган ҳолатларнинг 90 фоизни «ҳиндча» штамм ташкил қилади.
Шунингдек, у COVID-19 билан касалланганларни ҳам эмланишга чақирди. Бу қонда вирусни зарарсизлантирадиган антитаналар титрини оширишга имкон беради.
«Мамлакатимизда COVID-19 га қарши самарали вакцина мавжуд, бу «Спутник V» вакцинаси, ҳеч бўлмаганда Россия ҳудудида пандемияни тугатиш учун препаратдан имкон қадар тез ва кенг фойдаланиш керак. Бу касаллик жуда маккор, уни енгил шаклда ўтказиш — ушбу касалликдан ҳимояланишни англатмайди», — дея таъкидлади Гинцбург.
Унинг қўшимча қилишича, агар эмлаш кампанияси ўз мақсадларига эришмаса, оғир ва ўлимга олиб келадиган ҳолатларнинг нисбати 1—2 фоиздан 5—10 фоизгача кўтарилиши мумкин. Бунга йўл қўймаслик учун аҳолининг 70 фоизини икки-тўрт ой ичида эмлаш керак.
Ўтган кун давомида Россияда пандемия бошидан буён энг кўп ўлим сони қайд этилди — 652. Мамлакатдаги COVID-19 қурбонларининг умумий сони 134 545 кишига етди. Шу пайтгача Россиядаги 85 та ҳудудда жами 5 493 557 кишида инфекция қайд этилган, шуларнинг 4 984 037 нафари касалликдан соғайган.
Изоҳ (0)