Қашқадарё вилояти Қарши шаҳридаги кўлнинг ўртасида қолиб кетган кема ва унинг йўловчиларига ёрдам кўрсатилди, дея хабар бермоқда Фавқулодда вазиятлар вазирлиги ахборот хизмати.

Ҳодиса 28 июнь куни тунда Қарши шаҳрида содир бўлган. 16 йўловчидан иборат кичик кема (катер) саёзлиги боис кўл ўртасида қолиб кетган.

Ушбу ҳолатдан чиқиб кетиш учун бир неча бор муваффақиятсиз уринишлардан сўнг, кема эгаси Қашқадарё вилояти Фавқулодда вазиятлар бошқармаси қутқарув гуруҳини ёрдамга чақирган.

Фавқулодда вазиятлар вазирлиги ходимлари кемани соҳилга етказиб, йўловчиларни хавфсиз ҳудудга эвакуация қилган. Ҳодисадан жабрланганлар йўқ.

Бундан аввал Самарқанддаги сув омборида чўкиб кетаётган фуқаро қутқариб қолингани, Ўзбекистонда ёз мавсумигача неча киши чўкиш билан боғлиқ бахтсиз ҳодисага учрагани маълум қилингани ҳамда Тошкентда ёнғиндан омон қолишга уринган қиз 4-қаватдан сакрагани ҳақида хабар берилганди.