Тошкент вилоятининг қатор туманларида фуқароларнинг табиатга нисбатан бееътибор муносабатлари оқибатида 129 гектар ер майдони ёниб кетди. Бу ҳақда вилоят Экология ва атроф-муҳитни муҳофаза қилиш бошқармаси матбуот хизмати хабар берди.
Маълум қилинишича, Тошкент вилояти Экология ва атроф-муҳитни муҳофаза қилиш бошқармаси ҳамда ҳудудий инспекциялари томонидан 28—29 июнь кунлари экологик назорат тадбирлари олиб борилган. Тадбирлар давомида вилоятнинг қатор туманларида бошоқли дон экинларидан бўшаган майдонларида сомон ёқилиши натижасида жами 40 та қонун бузилиш ҳолати аниқланган.
Айрим тадбиркорлар ҳамда фуқароларнинг табиатга нисбатан эътиборсизлиги натижасида 129 гектар ер майдони ёниб кетган. Оқибатда атроф-муҳитга 113 178 492 сўм миқдорида зарар етказилган.
Барча қонун бузилиш ҳолатлари юзасидан Маъмурий жавобгарлик тўғрисидаги кодекснинг 88-моддасига (атмосфера ҳавосини муҳофаза қилиш талабларига риоя қилмаслик) асосан маъмурий баённомалар расмийлаштирилиб, жарима ҳамда атроф-муҳитга етказилган зарарни ундириш бўйича тайёрланган материаллар суд органларига қонуний қарор чиқариш учун йўналтирилган.
Аввалроқ Самарқандда ғалласи ўриб олинган 3 гектар ер ёниб кетгани, Сирдарёдаги ўрмон хўжалигининг салкам 150 гектар майдони ёниб кетгани ҳақида хабар берилган эди.
Изоҳ (0)