Ўзбекистонда 22 июндан жамоат транспортига ниқобсиз чиқиш тақиқланган. Бу талаб қанчалик бажариляпти? (фото)

Коронавирусга қарши кураш бўйича Республика махсус комиссияси қарори билан Ўзбекистонда йўналишли автобус ҳайдовчилари (кондукторлари) ва метро кузатувчилари ниқобсиз бўлган шахсларни транспорт воситалари салонига чиқармаслик (киритмаслик) чораларини кўриши белгиланган. Комиссиянинг бундай талаби 22 июнь куни маълум бўлган эди.

«Дарё» мухбирлари ва муштарийларининг маълум қилишича, метро бекатларига киришда аксарият ҳолларда йўловчилардан тиббий ниқобларни тақиб олиш сўралмоқда. Бекатларнинг ўзида эса ниқоб тақмаган ёки ниқобни бурнидан тушириб, иягига тақиб олган йўловчиларни етарлича кўп учратиш мумкин. Йўналишли автобусларда эса тиббий ниқоб тақиш талабининг бажарилиши ҳаминқадар — автобуслардаги ниқобсиз йўловчилар сони метродагидан сезиларли кўп.

Масъуллар олдига ниқобсиз йўловчиларни жамоат транспортига чиқармаслик талаби қўйилган, аммо ниқобсиз йўловчиларни ниқоб билан таъминлаш вазифаси қўйилмаган — метрополитенда ҳам, автобусларда ҳам (агар қоидалар бажарилишини қатъий талаб қиладиган автобусчилар учраб қолса) ниқобсиз йўловчиларга на бепул, на пулга ниқоб таклиф қилинмоқда. Масалан, метрода ниқобсизлар шунчаки бекатга киритилмаяпти.

Метрополитендан фойдаланувчи «Дарё» ходимларидан бирининг сўзларига кўра, «Дўстлик-2» бекатидан «Дўстлик» бекатига ўтиш жойида сўнгги вақтларда биринчи марта айнан 28 июнь, душанба куни (карантин талаблари нисбатан кучайтирилган сана) ички ишлар органлари ходимлари томонидан «тиббий ниқобларни тўғри тақиб олиш» талаби илгари сурилган. Тошкент метросининг йўловчилар оқими энг катта бекатларидан бири «Чилонзор»да эса шу куни ниқоб тақиб олиш сўралмаган.

Учтепа туманида яшовчи ходимлардан бирининг ҳикоя қилишича, у қатновчи автобус кондуктори «Чилонзор» метроси олдидаги шоҳбекатга яқинлашганида «бу ерда текширув бор»лиги сабаб йўловчилардан ниқобларни тақиб олишни сўраган. Эътиборга молик томони, расмийлар транспортда ниқобсиз юришни тақиқламоқда, бироқ пандемия шароитида транспорт қатновини янада яхшилаш (ва шу орқали жамоат транспортидаги тиқилинчларнинг олдини олиш) чораларини кўрмаяпти. Сўнгги ойлар давомида Тошкентда бир қатор марказий автобус йўналишларининг, шунингдек, Тошкент метросида ҳаракат интерваллари узайган.

2020 йил октябрида Тошкентда «турли юқумли мавсумий инфекциялар тарқалишининг олдини олиш ва йўловчилар саломатлигини асраш мақсадида» шаҳар жамоат транспорти (автобус, метро, «маршрутка»лар) хизматидан фойдаланганда йўловчиларнинг тиббий ниқоб ва қўлқопда бўлиш тартиби жорий этилган ва йўловчиларга ҳар куни салкам 17 миллион сўмлик қўлқоплар бепул тарқатилган эди. Расмийларнинг ушбу ташаббуси жамоатчилик томонидан кескин танқид остига олинган эди.