Ўзбекистонга Pfizer, Moderna ёки ЖССТ тасдиқлаган бошқа вакцина келиши кутилмоқда. Бу ҳақда Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбоновга таяниб, «Халқ сўзи Online» хабар берди.
Ботир Қурбонов чет элга ўқишга кетмоқчи бўлган фуқаролардан «Нега Ўзбекистонда ЖССТ тасдиқлаган вакциналар билан эмлаш олиб борилмаяпти?» дейилган саволга жавоб қайтарди.
«Август ойида Ўзбекистонга COVAX дастури доирасида AstraZeneca (CovieShield эмас), Pfizer, Moderna ёки ЖССТ тасдиқлаган бошқа вакцина келиши кутилмоқда», — дейди Қурбонов.
Маълумот учун, Ўзбекистон COVAX’га 2020 йилнинг август ойида қўшилган. Дастурнинг мақсади лицензияланган вакцинани унинг барча иштирокчилари ўртасида тенг равишда тақсимлашдир. Мамлакатга 2 миллиондан ортиқ дозада AstraZeneca вакцинасини етказиб бериш режалаштирилган. Март ойининг ўрталарида 660 минг дозадан иборат биринчи партия қабул қилинган.
Эслатиб ўтамиз, аҳолини коронавирусга қарши эмлаш тадбирлари 1 апрелдан бошланди. Эмлаш ихтиёрий ва бепул, вакцина олишдан бош тортганларга ҳеч қандай чора кўрилмайди. Мамлакатда июнь ойи охиригача 4 миллион кишини коронавирусга қарши эмлаш режалаштирилган. 22 июндан Ўзбекистонда коронавирусга қарши эмланувчилар гуруҳи яна кенгайган — энди 50 ёш ва ундан катталар бепул вакцина олиши мумкин.
Изоҳ (0)