Сурхондарё вилояти Термиз шаҳрида пиёдани уриб юбориб, воқеа жойидан қочиб кетган Cobalt ҳайдовчиси унинг ўлимига сабабчи бўлди. Бу ҳақда ЙҲХББ матбуот хизмати хабар берди.
24 июнь куни соат 17:00 атрофида вилоят ЙҲХБ навбатчилик қисмига келиб тушган хабарга кўра, М-39 автомобиль йўлининг 1456-километрида номаълум машина шу ҳудудда яшовчи фуқарони уриб юборган ва жабрланувчи воқеа жойида ҳалок бўлган.
Ҳолат юзасидан тўсиб ушлаш тезкор тадбири ўтказилганида воқеа жойида Cobalt’га тегишли эҳтиёт қисмлар тушиб қолгани аниқланган. Шунингдек, тезкор тадбир натижасида ушбу автомобиль Термиз шаҳри «Юлдуз» маҳалласида яшовчи фуқарога тегишли экани аниқланган ва машина унинг уйидан топилган.
Қайд этилишича, машина эгаси маст бўлгани учун Cobalt’ни унинг таниши бошқариб кетаётган бўлган. Пиёдани уриб юборишига ҳайдовчининг нимагадир чалғиб уни кўрмай қолгани, ёки ўзининг сўзлари билан айтганда, машинани уйқусираб бошқариб кетаётгани сабаб бўлган.
Йўлда ётган ЙТҲ қурбонини ўткинчилардан бири кўриб қолган ва зудлик билан ИИБга хабар берган.
Ҳалок бўлган пиёдага биринчи ёдам кўрсатилганида унинг ҳаётини сақлаб қолиш имкони бўлиши мумкинлиги истисно этилмаган.
Аввалроқ Тошкентда пиёда Lacetti уриб юбориши оқибатида ҳалок бўлгани, Сурхондарёда тезликни меъёридан оширган Nexia пиёдани уриб юбориб унинг ўлимига сабаб бўлгани, Қашқадарёда икки пиёдани уриб юбормаслик учун рулни ўнгга бурган Nexia чуқурга ағанади. Унинг ортидан келаётган машина эса уларни уриб юборгани ҳақида хабар берилган эди.
Изоҳ (0)