Самарқандда 12 йил давомида одамларнинг умумий 1,5 млрд сўм пулларини ўзлаштирган аёл ушланди

Фуқароларнинг 1,5 миллиард сўмдан ортиқ пулларини ўзлаштирган аёл Самарқанд вилоятида қўлга олинди, дея хабар қилмоқда Тошкент шаҳар ИИББ ахборот хизмати.

Қайд этилишича, 2020 йил март ойида ИИО Фаолиятини мувофиқлаштириш бошқармаси навбатчилик қисмига фуқаро Д.Қ. исмли аёл ариза билан мурожаат қилган.

Ўз аризасида у М.Д. исмли аёлга озиқ-овқат маҳсулотларини паст нархда етказиб бериш учун 50 миллион сўм берганини ва уни ҳозирда фирибгарликда гумон қилиб чора кўришни сўраган.

Олиб борилган тергов-қидирув жараёнларида ўзини одамларга М.Д. деб таништирган шахс бир неча фуқарога жуда кўп миқдорда фирибгарлик ҳолатларини содир этгани аниқланди. Тергов ҳаракатлари давомида унинг ҳақиқий исми Т.Д. экани аниқланиб, мазкур шахсга нисбатан қидирув эълон қилинган.

Жиноят қидирув ходимлари олиб борган тезкор тадбирлари натижасида Т.Д. 2021 йил Самарқанд вилоятида ушланиб, эҳтиёт чораси тариқасида қамоққа олинган.

«Оилавий шароитим тўғри келмасдан 1994 йил турмуш қурган уйимдан чиқиб кетдим. 2009 йилдан бери қидирувдаман. Қозоғистондан ёғ, шакар каби маҳсулотларни олиб келиб юрардим. Одамлар берган пулларни ўзимни эҳтиёжим учун ишлатиб юборардим.

Шу вақт ичида ҳужжатим йўқлиги сабаб хорижга чиқмаганман. Қилган ишларимдан мингдан минг пушаймонман», – дейди гумонланувчи.

Мазкур ҳолат юзасидан Т.Д.га Жиноят кодексининг 168-моддаси 2-қисми «а» банди (анча миқдорда фирибгарлик), 168-моддаси 3-қисми «а», «б» банди (кўп миқдорда ва такроран содир этилган фирибгарлик), 168-моддаси 4-қисми «а» банди (жуда кўп миқдорда фирибгарлик) ва бошқа бир қанча моддалар билан айблов эълон қилиниб, эҳтиёт чораси тариқасида қамоққа олиш қўлланилган.

Тергов ҳаракатлари якунига кўра, Т.Д. жами 24 нафар фуқарога нисбатан фирибгарлик жинояти содир этиб, умумий миқдорда 1 миллиард 500 миллион сўмдан ортиқ моддий зиён етказгани аниқланган.

Ҳозирги вақтда жиноий иш Жиноят ишлари бўйича Учтепа туман судига юборилган.

Бундан аввал Чирчиқ давлат педагогика институтига ўқишга киритиб қўйиш учун икки кишидан 9 минг доллар олган яна бир шахс ушлангани, Самарқандда таниқли актриса номидан сохта профил очиб, одамларнинг банк карталаридан пул ечиб олган 18 ёшли йигит ушлангани ҳамда Самарқандда фуқарони алдаб, унинг 50 минг доллар пулини ўзлаштирган адвокат 7 йилга озодликдан маҳрум қилингани ҳақида хабар берилганди.