Samarqandda taniqli aktrisa nomidan soxta profil ochib, odamlarning bank kartalaridan pul yechib olgan 18 yoshli yigit ushlandi

Samarqand viloyatida o‘zgalarning bank kartlaridan pul yechib olgan yigit ushlandi, deya xabar bermoqda IIV matbuot xizmati.

Ma’lum bo‘lishicha, Qoraqalpog‘istonning Nukus shahrida yashovchi fuqaro D.K. 2021-yilning 15-mart kuni Nukus shahar ichki ishlar bo‘limiga murojaat qilgan. Arizaga ko‘ra, 14-mart kuni qizi N.R.ning Instagram ijtimoiy tarmog‘idagi profiliga Giveaway-asal va @asalshodieva_dar1t nomi bilan ochilgan noma’lum profil egasi tomonidan “Siz 200 000 so‘m pul mukofotini yutib oldingiz” degan mazmundagi yozma xabarnoma kelgan.

Qiz profil ortidagi noma’lum shaxs bilan yozishma jarayonida uning aldovlariga ishonib, o‘ziga tegishli UzCard bank kartasining kodi va parolini yozib bergani, so‘ng shu kuni soat 21:00 larda bank kartasida mavjud bo‘lgan jami 600 000 so‘m miqdordagi puli yo‘qolgan.

Holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, olib borilgan tezkor tadbirlar natijasida ushbu jinoyatni sodir etgan shaxs Samarqand shahrida yashovchi 2003-yilda tug‘ilgan fuqaro A.A. ekani aniqlandi.

Hozirda ushbu fuqaroning boshqa turdosh jinoyatlarga aloqadorligi tekshirilmoqda.

“Ichki ishlar vazirligi yana bir bor ogohlantiradi, bank kartalaringizning kodi va parolini hech qanday sharoitda, hech kimga ma’lum qilmang, sodda bo‘lmang, firibgarlarning nayranglariga tushib qolmang”, — deyiladi IIB xabarida.

Bundan avval Buxoroda fuqarodan pul talab qilgan soxta Milliy gvardiya xodimi qo‘lga olingani, Toshkentda serjantlar tayyorlash maktabiga 12 ming dollarga o‘qishga kiritib qo‘ymoqchi bo‘lganlar ushlangani hamda Andijonda o‘g‘lining fermer xo‘jaligiga tegishli 10 sotix yerni 6 ming dollarga sotmoqchi bo‘lgan shaxs qo‘lga olingani haqida xabar berilgandi.