НАТО Ҳарбий қўмитаси (альянснинг энг юқори ҳарбий органи) раҳбари Стюарт Пич Хитой ҳарбий модернизациясининг «ҳайратда қолдирадиган» тезлиги ҳақида гапириб, НАТО ушбу жараённи диққат билан кузатиб бориши кераклигини таъкидлади. Бу ҳақда у ўзининг Financial Times газетасига берган интервьюсида айтиб ўтди.
«Хитой ўз кемаларини қанчалик тез қургани, қисқа муддатда ҳаво кучларини модернизация қилгани, кибернетика ва ахборот бошқарувининг бошқа шаклларига қанча маблағ киритгани, ҳайратга солади», — деди Пич.
Пичнинг таъкидлашича, НАТОнинг барча аъзолари вазиятни таҳлил қилиб, иттифоқ учун Хитойнинг ҳарбий амбициялари нимани англатишини ҳал қилиши зарур.
НАТО Ҳарбий қўмитаси раҳбари сўнгги йилларда Россия ва Хитой ҳарбийларининг қўшма машғулотлари «нисбатан кичик»дан «йирик машғулотлар ва тайёрлов имкониятлари»га ўтганини таъкидлади. Бироқ у икки мамлакат стратегик шериклик сари интилаётгани ҳақидаги тахминларни рад этди.
Пичнинг фикрига кўра, Россия ва Хитой Арктикадаги рақобат билан боғлиқ ҳолда қарама-қаршиликка киришиши мумкин. ХХР аллақачон ўзини «субарктика кучи» деб эълон қилган, Россия эса шимолий минтақаларида ҳарбий инфратузилмасини кенгайтирмоқда.
Рақобатнинг кучайиши глобал исиш ва музликларнинг эриши билан боғлиқ бўлиши мумкин, чунки бу Шимолий денгиз йўлини эксплуатация қилиш учун кенг имкониятлар беради ва минтақанинг бой минерал ресурсларига киришни осонлаштиради.
«Арктикада узоқ вақт давомида Хитой ва Россия ўртасида ҳеч қандай уйғунлик бўлмайди», — деди Пич.
Стюарт Пич НАТО Ҳарбий қўмитасини 2018 йилдан бери бошқариб келади.
Шимолий денгиз йўли — Россиянинг Европа қисми ва Узоқ Шарқ ўртасидаги энг қисқа сув йўли. Россия қонунчилигида у «Арктикада Россиянинг тарихий равишда ўрнатилган миллий ягона транспорт алоқаси» сифатида мустаҳкамланган. Йўл Шимолий Муз океанининг денгизлари (Баренс, Кара, Лаптев денгизи, Шарқий Сибир, Чукот) ва қисман Тинч океанидан (Беринг денгизи) ўтади.
Изоҳ (0)