Сенатнинг ўн олтинчи ялпи мажлисида «Жиноий фаолиятдан олинган даромадларни легаллаштиришга қарши курашиш тартиби янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги Ўзбекистон Республикаси қонуни муҳокама қилинди.
Қайд этилишича, БМТнинг коррупция, гиёҳвандлик воситалари ва психотроп моддаларни ғайриқонуний равишда муомалага киритишга, трансмиллий уюшган жиноятчиликка ҳамда терроризмни молиялаштиришга қарши кураш тўғрисидаги Конвенциялари талаблари ижросини таъминлаш, жиноий даромадларни легаллаштиришга ва терроризмни молиялаштиришга қарши курашиш бўйича нуфузли халқаро ташкилотларнинг (FATF стандартлари, Евросиё гуруҳи ҳамда Иқтисодий ҳамкорлик ва ривожланиш ташкилоти) тавсияларини миллий қонунчиликка имплементация қилишда мазкур ўзгартириш ва қўшимчалар муҳим аҳамият касб этади.
Мазкур қонун билан 3 та кодекс ва 8 та қонунга ўзгартириш ва қўшимчалар киритилмоқда. Жумладан, Жиноят ва Жиноят-процессуал ҳамда Маъмурий жавобгарлик тўғрисидаги кодексларга, «Суд ҳужжатлари ва бошқа органлар ҳужжатларини ижро этиш тўғрисида»ги, «Давлат божхона хизмати тўғрисида»ги, «Давлат солиқ хизмати тўғрисида»ги ва «Қимматли қоғозлар бозори тўғрисида»ги, шунингдек, «Прокуратура тўғрисида»ги қонунларга ўзгартириш киритилмоқда.
Муҳокама давомида сенаторлар томонидан қонунни ишлаб чиқишда миллий қонун ҳужжатлари, хорижий мамлакатлар тажрибаси ва юрист-олимлар фикрлари ўрганилмаган ва таҳлил қилинмаганлиги қайд этилди.
Шунингдек, ушбу ҳолатлар, ўз навбатида, турли салбий оқибатларга олиб келиши мумкинлиги таъкидланди.
Бундан ташқари, қонунчилик ташаббуси ҳуқуқи субъекти ҳамда қонун лойиҳаси ташаббускорлари томонидан соҳада вужудга келган муаммоларни комплекс таҳлил қилиб, сўнгра амалдаги қонунчилик нормаларини тубдан такомиллаштириш масаласини ўрганиб чиқиш ва шундан сўнггина Жиноят, Жиноят процессуал, Маъмурий жавобгарлик тўғрисидаги кодексларга махсус мусодара қилиш чораларини белгилаш мақсадга мувофиқ ҳисобланиши билдирилди.
Шу боис қонун сенаторлар томонидан рад этилди.
Бундан аввал Сенат давлат тили тўғрисидаги қонунга ўзгартириш киритишни маъқуллагани, Тошкент вилоятидаги туман ва шаҳарлар чегарасини ўзгартириш бўйича қарорни маъқуллагани ҳамда Олий Мажлис Сенатида янги қўмита ташкил этилгани ҳақида хабар берилганди.
Изоҳ (0)