Ўзбекистонда 2021 йилда 140 мингдан ортиқ ишсиз ёшлар тадбиркорлик асосларига ўқитилиб, бизнесга йўналтирилади. Бу ҳақда Ўзбекистон Электрон оммавий ахборот воситалари миллий ассоциацияси томонидан Савдо-саноат палатасида 23 июнь куни ўтказилган Очиқ мулоқотда маълум қилинди.
Қайд этилишича, палата томонидан 14 та ўқув маркази фаолияти йўлга қўйилган. Малакали мутахассислар ва тадбиркорликка кўмаклашиш марказлари билан биргаликда 103 мингдан ортиқ аҳоли тадбиркорликка ўқитилган.
Президент томонидан 2020 йил 25 декабрдаги ёшлар билан учрашувда берилган топшириқ асосида ёшларни тадбиркорликка ўқитиш ва бизнесга йўналтириш бўйича 2021 йилнинг ўзида 48 ва 150 соатлик ўқув дастурлари бўйича 140 мингдан ортиқ ишсиз ёшлар тадбиркорлик асосларига ўқитилиб, бизнесга йўналтирилиши мақсад қилинган.
Очиқ мулоқотда, шунингдек, палата ҳузурида дунёнинг нуфузли университетларидан бири бўлган Туркия иқтисодиёт ва технологиялар университетининг Тошкент филиали ташкил этилгани ҳамда халқаро бизнес ва тадбиркорлик, электрон тижорат ва технологияларни бошқариш, архитектура ва дизайн, компьютер муҳандислиги, интерьер архитектураси каби йўналишларда кадрлар тайёрлаш ишлари олиб борилаётгани таъкидланган.
Эслатиб ўтамиз, Шавкат Мирзиёев 2020 йил 25 декабрда Тошкентда бўлиб ўтган Ўзбекистон ёшлари форумида 2021 йилда камида 500 минг нафар ёшни иш билан таъминлаши мумкин бўлган «Ёшлар: 1+1» дастури доирасида ишсиз ва уюшмаган ёшларни касб-ҳунар ва тадбиркорликка ўқитиш ташкил этилишини маълум қилганди.
Изоҳ (0)