O‘zbekistonda 2021-yilda 140 mingdan ortiq ishsiz yoshlar biznesga yo‘naltirilishi ma’lum qilindi
O‘zbekistonda 2021-yilda 140 mingdan ortiq ishsiz yoshlar tadbirkorlik asoslariga o‘qitilib, biznesga yo‘naltiriladi. Bu haqda O‘zbekiston Elektron ommaviy axborot vositalari milliy assotsiatsiyasi tomonidan Savdo-sanoat palatasida 23-iyun kuni o‘tkazilgan Ochiq muloqotda ma’lum qilindi.
Qayd etilishicha, palata tomonidan 14 ta o‘quv markazi faoliyati yo‘lga qo‘yilgan. Malakali mutaxassislar va tadbirkorlikka ko‘maklashish markazlari bilan birgalikda 103 mingdan ortiq aholi tadbirkorlikka o‘qitilgan.
Prezident tomonidan 2020-yil 25-dekabrdagi yoshlar bilan uchrashuvda berilgan topshiriq asosida yoshlarni tadbirkorlikka o‘qitish va biznesga yo‘naltirish bo‘yicha 2021-yilning o‘zida 48 va 150 soatlik o‘quv dasturlari bo‘yicha 140 mingdan ortiq ishsiz yoshlar tadbirkorlik asoslariga o‘qitilib, biznesga yo‘naltirilishi maqsad qilingan.
Ochiq muloqotda, shuningdek, palata huzurida dunyoning nufuzli universitetlaridan biri bo‘lgan Turkiya iqtisodiyot va texnologiyalar universitetining Toshkent filiali tashkil etilgani hamda xalqaro biznes va tadbirkorlik, elektron tijorat va texnologiyalarni boshqarish, arxitektura va dizayn, kompyuter muhandisligi, interyer arxitekturasi kabi yo‘nalishlarda kadrlar tayyorlash ishlari olib borilayotgani ta’kidlangan.
Eslatib o‘tamiz, Shavkat Mirziyoyev 2020-yil 25-dekabrda Toshkentda bo‘lib o‘tgan O‘zbekiston yoshlari forumida 2021-yilda kamida 500 ming nafar yoshni ish bilan ta’minlashi mumkin bo‘lgan “Yoshlar: 1+1” dasturi doirasida ishsiz va uyushmagan yoshlarni kasb-hunar va tadbirkorlikka o‘qitish tashkil etilishini ma’lum qilgandi.
