Бухоронинг тарихий марказида меҳмонхона қурилиши бошланди, аммо бу овоза бўлгач, қурилиш тўхтатилди
Бухоро тарихий марказида жойлашган Гавкушон кўчасида меҳмонхона қурилиши бошланди, аммо бу овоза бўлганидан кейин қурилиш тўхтатилди, деб хабар бермоқда «Anhor.uz» Маданий мерос департаментига таяниб.
Маълум қилинишича, 19 июнь куни «Troll.uz» Telegram каналида «Қурилиш соҳасидаги муаммолар. Бухородаги ‘Гавкушон’ маҳалласи мисолида» номли видеолавҳа эълон қилинди. Унда Бухоро тарихий марказида жойлашган Гавкушон кўчасида қурилиши режалаштирилган меҳмонхона бўйича сўз борган.
Мазкур видеолавҳа бўйича тегишли ташкилотлар вакиллари билан биргаликда жойига чиқиб ўрганилганда, Бухоро шаҳар ҳокимининг 2018 йил 28 июндаги қарорига асосан Prime Real Estate МЧЖга Бухоро шаҳрининг Хўжа Рангрез кўчасидаги қишлоқ хўжалигида фойдаланилмайдиган ерлар ҳисобидан 500 квадрат метр ер майдони ажратилгани аниқланган. Шунингдек, Бухоро шаҳар ҳокимининг 2021 йил 25 мартдаги қарорига асосан Бухоро шаҳар ҳокимининг 2018 йил 28 июндаги қарорининг биринчи ва иккинчи бандидаги «Хўжа Рангрез кўчаси» сўзлари «Говкушон кўчаси» сўзлари билан ўзгартирилган.
Маданият вазирлиги ҳузуридаги Маданий мерос департаменти Илмий-эксперт кенгашининг 2019 йил 12 декабрдаги йиғилиш баёнига мувофиқ, белгиланган ҳудудда меҳмонхона қурилиши бўйича лойиҳа таклифи баландлигини ер сатҳидан 7,1 метрдан оширмаслик шарти билан маъқулланган.
Бухоро вилояти қурилиш бош бошқармаси ҳузуридаги Архитектура-шаҳарсозлик кенгашининг 2020 йил 10 февралдаги йиғилиш баённомасига асосан мазкур ҳудудда Prime Real Estate томонидан меҳмонхона бино-иншооти қурилишини лойиҳалаштириш учун бош режаси ва фасад кўринишлари келишилган.
Prime Real Estate томонидан қурилиш ишлари олиб бориладиган ҳудуд тозаланиб, атрофи ўраб олинган бўлса ҳам барча қурилиш ишлари тўхтатилган. Айни пайтда ҳудудда Фанлар академияси Миллий археология институти мутахассислари томонидан археологик қазилма ишлари олиб борилмоқда.
Мазкур лойиҳа бўйича аввал олиб борилган ўрганиш давомида жамият раҳбариятига ушбу ҳудуд «Бухоро тарихий маркази»да эканлиги ва тарихий обидалар зич жойлашганлиги сабабли меҳмонхона ташкил этиш лойиҳасини ЮНЕСКО Умумжаҳон мероси маркази билан келишиш шарт эканлиги тушунтирилган.
Маълум бўлишича, мазкур лойиҳанинг «Бухоро тарихий маркази» — бутунжаҳон мероси объектига бўлган таъсирини баҳолаш ҳисоботини тайёрлаш ва ўрнатилган тартибда халқаро ташкилотлар билан келишиш мақсадида Prime Real Estate томонидан хорижий экспертлар жалб қилинган.
Лойиҳа ташаббускорига ЮНЕСКО ва ИКОМОС мутахассислари томонидан лойиҳага ижобий хулоса берилмагунга қадар қурилиш ишларини бошламаслик лозимлиги бўйича тушунтиришлар берилган.
Президентнинг 2021 йил апрель ойидаги фармони билан Ўзбекистонда маданий мерос муҳофазаси кучайтирилиши белгиланган. Фармон билан Туризм ва спорт вазирлиги, Фанлар академияси, Қурилиш вазирлиги, Кадастр агентлиги, Қорақалпоғистон Вазирлар Кенгаши, вилоятлар ва Тошкент шаҳар ҳокимликлари Бош прокуратура билан биргаликда уч ой муддатда маданий мерос объектларининг қўриқланадиган теграларида ноқонуний қурилган қурилмалар ва бино-иншоотларни бартараф этиш ҳамда уларнинг ер майдонларидан ноқонуний фойдаланишнинг олдини олиш бўйича чора-тадбирларни белгилаш юклатилган.
Ўзбекистон Вазирлар Маҳкамасининг 14 июндаги қарори билан Ўзбекистонда ЮНЕСКО билан ҳамкорликда маданий мерос масалалари бўйича Халқаро маслаҳат қўмитаси ташкил этилди.
Эслатиб ўтамиз, май ойида Тошкентдаги Мингўрик ёдгорлиги ёнидаги ИИББ Маънавият ва маърифат маркази биноси қурилиши Маданий мерос департаменти рухсатисиз бошлангани аниқланганди.
