Фарғона вилоятининг энг машҳур туристик маскани — Шоҳимардонда сайёҳлик мавсуми бошланди. Бу ҳақда Қирғизистоннинг Боткен вилояти Қадамжой туманида ўтказилган тадбирда маълум қилинди, дея хабар бермоқда «Дарё» мухбири Азизжон Эрматов.
Қайд этилишича, Шоҳимардон қишлоғи ва Қадамжой туманида сайёҳлик мавсуми очилишига бағишланган тантанали тадбирлар ўтказилган. Унда Фарғона ва Боткен вилояти делегациялари, таниқли маданият ва санъат вакиллари, журналистлар иштирок этган.
Тадбирда қатнашган Фарғона ҳокими Хайрулла Бозоров, Боткен губернатори Абдукарим Алимбоев ўзбек ва қирғиз халқларининг туризм соҳасидаги ҳамкорлиги янги босқичга кўтарилганини таъкидлаган.
Шундан сўнг Шоҳимардон марказидан 5 километр узоқликда, денгиз сатҳидан 3000 метр баландликда жойлашган Кўли Қуббонга элтувчи узоқ вақт давомида ёпиқ бўлган осма дор йўли қайтадан очилган.
Фарғона вилояти ҳокими Хайрулла Бозоров ва Боткен вилояти губернатори Абдукарим Алимбоев осма дор йўлидан ўтиб, Кўли Қуббон бўйлаб қайиқда сайр қилган.
Фарғона вилояти ҳокими Хайрулла Бозоров ва Боткен вилояти губернатори Абдукарим Алимбоев Шоҳимардон қишлоғи марказида жойлашган истироҳат боғида маҳаллий аҳоли вакиллари билан учрашган.
Учрашувда Хайрулла Бозоров Шоҳимардонга микроавтобуслар қатнови йўлга қўйилишини ва қишлоқ марказидаги истироҳат боғи таъмирланишини маълум қилган.
«Бизда мана шундай ажойиб жойлар бор. Бунақанги чиройли табиатни, кўнгли пок, қалби тоза, самимий ва камтарин инсонларни Худо берган. Одамларимизнинг тинч, хотиржам ҳаёт кечиришларини таъминлаш, ўзаро қўшни давлатлар билан баҳамжиҳат, қадрдон бўлиб яшаш, дўстлик, биродарлик алоқаларини бундан-да мустаҳкамлаш мақсадида икки давлат делегациялари учрашиб турибмиз. Шоҳимардонга ёшлигимизда тез-тез оила-аъзоларимиз, синфдошлар, дўстлар билан келиб, зиёрат қилар эдик. Мана бугун ҳам бу ерга келиш насиб қилди. Ўша пайтлар бу ерлар гавжум, гуллаб-яшнаган, одамлар кўп бўлар эди. Мана яна Президентларимизнинг юксак сиёсий иродалари билан чегараларни очиш, ҳам иқтисодий, ҳам ижтимоий, маданий соҳаларни ривожлантириш борасида ҳаракат қиляпмиз.
Бугун Шоҳимардонда ҳам, Қадамжойда ҳам, Қурбон кўлда ҳам туристик мавсумнинг расмий очилиши. Ҳаммага эълон қиламиз. Бутун Ўзбекистон кўчиб келади Шоҳимардонга. Тўйлар, тантаналар бўлади. Мана, осма дор йўлини ҳам очдик, энди Шоҳимардонга келган туристлар Қурбон кўлини айланиши, зиёрат қилиши, дам олиши мумкин. Шоҳимардон марказидаги истироҳат боғини таъмирлаш учун ҳам пул берамиз. Тунги чироқлар ўрнатилади, кўчалар асфальт қилинади. Марказ ободонлаштирилиб, меҳмонларнинг келишига тайёргарликни бошлашимиз керак. Энг асосийси, йўловчилар учун микроавтобуслар қўйилади», — деди вилоят ҳокими Хайрулла Бозоров.
Шоҳимардонда сайёҳлик мавсумининг очилиши муносабати билан ташкилланган тантанали тадбирлар Боткен вилоятида давом эттирилган.
Қадамжой туманидаги «Металлург» стадионида ўзбек ва қирғиз халқларининг таниқли санъаткорлари иштирокида концерт дастури ўтказилган.
Изоҳ (0)