Давлат статистика қўмитаси Ўзбекистон бозорларидаги асосий маҳсулотларнинг нарх-навосини эълон қилди. Қайд этилишича, мазкур маълумотларнинг шаклланиш жараёнида, фақатгина деҳқон бозорлари ҳудудидаги озиқ-овқат маҳсулотлари нархлари ҳисобга олинган (супермаркет, минимаркет, дўконлардаги нархлар инобатга олинмаган).
Ўзбекистон ҳудудларидаги марказий деҳқон бозорларида, 2021 йил 23 июнь куни ўтказилган кузатув натижалари бўйича, алоҳида турдаги озиқ-овқат маҳсулотларининг минимал-максимал нархлари қуйидаги кўринишга эга бўлди:
Суякли мол гўшти – 45 000 сўмдан 68 000 сўмгача (килограмм)
Кузатув натижасига кўра, 1 килограмм суякли мол гўштининг минимал нархи Нукус шаҳрининг «Нукус деҳқон бозори», Наманган шаҳрининг «Наманган чорсу деҳқон универсал бозори»даги арзонлаштирилган гўшт расталарида қайд этилган (45 000 сўм).
Суякли мол гўштининг максимал нархи эса Тошкент шаҳрининг Фарҳод деҳқон бозори ва Миробод деҳқон бозорида кузатилди (хусусий тадбиркорлар расталарида 68 000 сўм). Шу билан бирга, мазкур бозорларда ташкил этилган арзонлаштирилган растада мол гўшти минимал 46 000 дан – 55 000 сўм оралиғида сотилмоқда.
Қўй гўшти – 50 000 сўмдан 80 000 сўмгача (килограмм)
Қўй гўштининг минимал нархи (50 000 сўм) кузатув натижасига кўра, Нукус шаҳрининг Нукус деҳқон бозори ва Тошкент шаҳрининг Фарҳод деҳқон бозоридаги арзонлаштирилган расталарда рўйхатга олинган.
Максимал нархи эса Тошкент шаҳрининг Олой деҳқон бозорида (хусусий тадбиркорлар расталарида 80 000 сўм) кузатилди. Шунингдек, ушбу бозорда қўй гўшти минимал 60 000 сўм оралиғида сотилмоқда.
Картошка – 1 500 сўмдан 6 000 сўмгача (килограмм)
Кузатув натижаларига кўра, Термиз шаҳрининг «Яшил дунё марказий деҳқон озиқ-овқат бозори» ва Фарғона шаҳрининг Марказий деҳқон бозорида ташкил этилган арзонлаштирилган савдо расталарида сотилаётган картошканинг нархи минимал нарх сифатида (1 500 сўм) қайд этилган.
Шу билан бирга, Тошкент шаҳрининг Олой деҳқон бозорида сотувдаги сараланган картошканинг нархи максимал нарх сифатида (6 000 сўм) қайд этилди. Ушбу бозорда арзонлаштирилган растада сотилаётган картошкани минимал 4 000 сўмга ҳам харид қилиш мумкин.
Пиёз – 800 сўмдан 3 500 сўмгача (килограмм)
Пиёз маҳсулотининг минимал нархи кузатув натижасига кўра, Термиз шаҳрининг «Яшил дунё марказий деҳқон озиқ-овқат бозори»да (850 сўм) рўйхатга олинди.
Максимал нарх сифатида эса Тошкент шаҳрининг Олой деҳқон бозорида сотувда бўлган сараланган пиёзнинг нархи кузатилди (3 500 сўм). Шунингдек, мазкур бозорда пиёзни минимал 1 300 сўмга ҳам харид қилиш мумкин.
Сабзи – 4 000 сўмдан 12 000 сўмгача (килограмм)
Сабзи маҳсулотининг минимал нархи кузатув натижасига кўра, Бухоро шаҳрининг Бухоро марказий деҳқон бозорида (4 000 сўм) қайд этилган. Шу билан бирга, мазкур бозорда сабзини максимал 10 000 сўмдан харид қилиш мумкин.
Чирчиқ шаҳрининг «Чирчиқ деҳқон бозори», Янгийўл шаҳрининг «Ихтисослашган Янгийўл шаҳар деҳқон бозори» ҳамда Тошкент шаҳрининг «Фарҳод деҳқон бозори»да сотувдаги тозаланган ва сараланган сабзининг нархи максимал нарх сифатида (12 000 сўм) қайд этилди. Шу билан бирга, мазкур бозорларда сабзини минимал 6 000–10 000 сўмдан харид қилиш мумкин.
Тухум – 5 000 сўмдан 14 000 сўмгача (10 дона)
Кузатув натижасига кўра, Наманган шаҳрининг «Наманган чорсу деҳқон универсал бозори» ва Тошкент шаҳрининг «Қўйлиқ деҳқон бозори»да арзонлаштирилган тухум расталаридаги майда тухумнинг нархи минимал нарх сифатида қайд этилди (5 000 сўм).
Максимал нархи эса Тошкент шаҳрининг «Эски жўва» деҳқон бозори ва Фарҳод деҳқон бозорида қайд этилган (йирик сараланган тухум 14 000 сўм). Шунингдек, мазкур бозорларда 10 дона майда тухумнинг минимал нархи 8 000–9 000 сўмни ташкил этган.
Гуруч – 5 000 сўмдан 18 000 сўмгача (килограмм)
Кузатув натижаларига кўра, гуруч маҳсулотининг минимал нархи Нукус шаҳрининг Нукус деҳқон бозори, Жиззах шаҳрининг Жиззах марказий деҳқон бозори, Термиз шаҳрининг «Яшил дунё марказий деҳқон озиқ-овқат бозори»да («Нукус-2» ва бошқа маҳаллий навли гуручлар 5 000 сўм) қайд этилган.
Максимал нарх эса, Тошкент шаҳрининг «Эски жўва» деҳқон бозорида 18 000 сўмдан кузатилди («Лазер» навли гуруч). Шу билан бирга, ушбу бозорларда гуручнинг минимал нархлари 6 000 сўмни ташкил этган.
Ўсимлик ёғи – 14 000 сўмдан 24 000 сўмгача (литр)
Ўсимлик ёғининг кузатув натижасига кўра, минимал нархи Нукус шаҳрининг Нукус деҳқон бозори, Андижон шаҳрининг Янги бозор деҳқон бозори, Жиззах шаҳрининг Жиззах марказий деҳқон бозори ва Гулистон шаҳрининг Гулистон деҳқон бозорида (маҳаллий пахта ёғи 14 000 сўм) кузатилди. Шунингдек, мазкур бозорлардаги хусусий тадбиркорлар расталарида пахта ёғини 15 000–18 000 сўм оралиғида ҳам харид қилиш мумкин.
Максимал нархи эса Янгийўл шаҳрининг «Ихтисослашган Янгийўл шаҳар деҳқон бозори» Тошкент шаҳрининг Олой бозори, Қўйлиқ деҳқон бозори ва Миробод деҳқон бозорида (кунгабоқар ёғи 24 000 сўм) кузатилди. Шунингдек, мазкур бозорларда кунгабоқар ёғини минимал 16 000–20 000 сўм оралиғида ҳам харид қилиш мумкин.
Шакар – 7 300 сўмдан 9 000 сўмгача (килограмм)
Шакар маҳсулотининг кузатув натижасига кўра, минимал нархи Тошкент шаҳрининг Фарҳод деҳқон бозоридаги арзонлаштирилган расталарда (7 300 сўм) қайд этилди.
Максимал нархи эса Жиззах шаҳрининг Жиззах марказий деҳқон бозори, Қарши шаҳрининг «Қарши деҳқон озиқ-овқат бозори», Наманган шаҳрининг «Наманган чорсу деҳқон универсал бозори» ва Тошкент шаҳрининг Фарҳод деҳқон бозорида (9 000 сўм) кузатилди.
Шунингдек, мазкур бозорларда шакарни минимал 7 300–8 500 сўм оралиғида ҳам харид қилиш мумкин.
Бундан аввал Қишлоқ хўжалиги вазирлиги яқин кунларда сабзи нархининг пасайиши кутилаётгани ҳамда Ўзбекистоннинг турли ҳудудларидаги сабзи нархлари мониторинг қилингани ҳақида хабар берилганди.
Изоҳ (0)