Шавкат Мирзиёев раислигида 24 июнь куни инвестиция ва экспорт соҳаларидаги устувор вазифаларга бағишлаб ўтказилаётган видеоселектор йиғилишида «Чармсаноат» уюшмасига 2021 йилда 221 миллион долларлик 248 та лойиҳани якунига етказиш бўйича топшириқ берилди.
Тармоқдаги мавжуд қувватлар аёллар пойабзалига талабни – 36 фоиз, болалар пойабзалига – 70 фоиз, сунъий чармга – 13 фоиз, чарм-атторлик маҳсулотларига – 75 фоизга таъминлайди, холос.
Президент мутасаддиларга бир ойда Андижон, Шаҳрихон, Жиззах, Наманган, Марғилон, Қўқон, Нурафшон ва Оҳангарон шаҳарлари, Ургут ва Самарқанд туманларида чарм маҳсулотлари ишлаб чиқариш бўйича кичик саноат зоналарини ташкил қилиш юзасидан топшириқ берди.
Ушбу ҳудудларда лойиҳаларни амалга ошириш учун қўшимча 50 миллион доллар кредит линияси ажратилади.
Худди шу каби йил якунига қадар электротехника ишлаб чиқариш ҳажмини 15 триллион сўмга етказиш, бунинг учун умумий қиймати 140 миллион долларлик 45 та лойиҳани ишга тушириш бўйича вазифалар қўйилди.
Шунингдек, Фармацевтика агентлиги вилоят ҳокимлари билан бирга, 2021 йилда умумий қиймати 146 миллион долларлик 36 та лойиҳани ишга тушириши шарт ва зарурлиги кўрсатиб ўтилди. Жумладан, Тошкент вилоятида – 7 та, Наманганда – 6 та, Андижон ва Самарқандда – 4 тадан, Тошкент шаҳри ва Сирдарёда – 3 тадан, Қорақалпоғистон, Хоразм ва Фарғонада – 2 тадан, Қашқадарё, Навоий ва Сурхондарёда – 1 тадан лойиҳа ишга туширилиши керак.
Бундан аввал Президент қарори билан хорижда чарм маҳсулотларини сотиш учун Мultibrand дўконлар ташкил этилиши ҳамда Ўзбекистонда 2021 йилдан Nike ва Адидас бренди остидаги кроссовкаларни ишлаб чиқариш йўлга қўйилиши ҳақида хабар берилганди.
Изоҳ (0)