Davlat statistika qo‘mitasi O‘zbekiston bozorlaridagi asosiy mahsulotlarning narx-navosini e’lon qildi. Qayd etilishicha, mazkur ma’lumotlarning shakllanish jarayonida, faqatgina dehqon bozorlari hududidagi oziq-ovqat mahsulotlari narxlari hisobga olingan (supermarket, minimarket, do‘konlardagi narxlar inobatga olinmagan).
O‘zbekiston hududlaridagi markaziy dehqon bozorlarida, 2021-yil 23-iyun kuni o‘tkazilgan kuzatuv natijalari bo‘yicha, alohida turdagi oziq-ovqat mahsulotlarining minimal-maksimal narxlari quyidagi ko‘rinishga ega bo‘ldi:
Suyakli mol go‘shti – 45 000 so‘mdan 68 000 so‘mgacha (kilogramm)
Kuzatuv natijasiga ko‘ra, 1 kilogramm suyakli mol go‘shtining minimal narxi Nukus shahrining “Nukus dehqon bozori”, Namangan shahrining “Namangan chorsu dehqon universal bozori”dagi arzonlashtirilgan go‘sht rastalarida qayd etilgan (45 000 so‘m).
Suyakli mol go‘shtining maksimal narxi esa Toshkent shahrining Farhod dehqon bozori va Mirobod dehqon bozorida kuzatildi (xususiy tadbirkorlar rastalarida 68 000 so‘m). Shu bilan birga, mazkur bozorlarda tashkil etilgan arzonlashtirilgan rastada mol go‘shti minimal 46 000 dan – 55 000 so‘m oralig‘ida sotilmoqda.
Qo‘y go‘shti – 50 000 so‘mdan 80 000 so‘mgacha (kilogramm)
Qo‘y go‘shtining minimal narxi (50 000 so‘m) kuzatuv natijasiga ko‘ra, Nukus shahrining Nukus dehqon bozori va Toshkent shahrining Farhod dehqon bozoridagi arzonlashtirilgan rastalarda ro‘yxatga olingan.
Maksimal narxi esa Toshkent shahrining Oloy dehqon bozorida (xususiy tadbirkorlar rastalarida 80 000 so‘m) kuzatildi. Shuningdek, ushbu bozorda qo‘y go‘shti minimal 60 000 so‘m oralig‘ida sotilmoqda.
Kartoshka – 1 500 so‘mdan 6 000 so‘mgacha (kilogramm)
Kuzatuv natijalariga ko‘ra, Termiz shahrining “Yashil dunyo markaziy dehqon oziq-ovqat bozori” va Farg‘ona shahrining Markaziy dehqon bozorida tashkil etilgan arzonlashtirilgan savdo rastalarida sotilayotgan kartoshkaning narxi minimal narx sifatida (1 500 so‘m) qayd etilgan.
Shu bilan birga, Toshkent shahrining Oloy dehqon bozorida sotuvdagi saralangan kartoshkaning narxi maksimal narx sifatida (6 000 so‘m) qayd etildi. Ushbu bozorda arzonlashtirilgan rastada sotilayotgan kartoshkani minimal 4 000 so‘mga ham xarid qilish mumkin.
Piyoz – 800 so‘mdan 3 500 so‘mgacha (kilogramm)
Piyoz mahsulotining minimal narxi kuzatuv natijasiga ko‘ra, Termiz shahrining “Yashil dunyo markaziy dehqon oziq-ovqat bozori”da (850 so‘m) ro‘yxatga olindi.
Maksimal narx sifatida esa Toshkent shahrining Oloy dehqon bozorida sotuvda bo‘lgan saralangan piyozning narxi kuzatildi (3 500 so‘m). Shuningdek, mazkur bozorda piyozni minimal 1 300 so‘mga ham xarid qilish mumkin.
Sabzi – 4 000 so‘mdan 12 000 so‘mgacha (kilogramm)
Sabzi mahsulotining minimal narxi kuzatuv natijasiga ko‘ra, Buxoro shahrining Buxoro markaziy dehqon bozorida (4 000 so‘m) qayd etilgan. Shu bilan birga, mazkur bozorda sabzini maksimal 10 000 so‘mdan xarid qilish mumkin.
Chirchiq shahrining “Chirchiq dehqon bozori”, Yangiyo‘l shahrining “Ixtisoslashgan Yangiyo‘l shahar dehqon bozori” hamda Toshkent shahrining “Farhod dehqon bozori”da sotuvdagi tozalangan va saralangan sabzining narxi maksimal narx sifatida (12 000 so‘m) qayd etildi. Shu bilan birga, mazkur bozorlarda sabzini minimal 6 000–10 000 so‘mdan xarid qilish mumkin.
Tuxum – 5 000 so‘mdan 14 000 so‘mgacha (10 dona)
Kuzatuv natijasiga ko‘ra, Namangan shahrining “Namangan chorsu dehqon universal bozori” va Toshkent shahrining “Qo‘yliq dehqon bozori”da arzonlashtirilgan tuxum rastalaridagi mayda tuxumning narxi minimal narx sifatida qayd etildi (5 000 so‘m).
Maksimal narxi esa Toshkent shahrining “Eski jo‘va” dehqon bozori va Farhod dehqon bozorida qayd etilgan (yirik saralangan tuxum 14 000 so‘m). Shuningdek, mazkur bozorlarda 10 dona mayda tuxumning minimal narxi 8 000–9 000 so‘mni tashkil etgan.
Guruch – 5 000 so‘mdan 18 000 so‘mgacha (kilogramm)
Kuzatuv natijalariga ko‘ra, guruch mahsulotining minimal narxi Nukus shahrining Nukus dehqon bozori, Jizzax shahrining Jizzax markaziy dehqon bozori, Termiz shahrining “Yashil dunyo markaziy dehqon oziq-ovqat bozori”da (“Nukus-2” va boshqa mahalliy navli guruchlar 5 000 so‘m) qayd etilgan.
Maksimal narx esa, Toshkent shahrining “Eski jo‘va” dehqon bozorida 18 000 so‘mdan kuzatildi (“Lazer” navli guruch). Shu bilan birga, ushbu bozorlarda guruchning minimal narxlari 6 000 so‘mni tashkil etgan.
O‘simlik yog‘i – 14 000 so‘mdan 24 000 so‘mgacha (litr)
O‘simlik yog‘ining kuzatuv natijasiga ko‘ra, minimal narxi Nukus shahrining Nukus dehqon bozori, Andijon shahrining Yangi bozor dehqon bozori, Jizzax shahrining Jizzax markaziy dehqon bozori va Guliston shahrining Guliston dehqon bozorida (mahalliy paxta yog‘i 14 000 so‘m) kuzatildi. Shuningdek, mazkur bozorlardagi xususiy tadbirkorlar rastalarida paxta yog‘ini 15 000–18 000 so‘m oralig‘ida ham xarid qilish mumkin.
Maksimal narxi esa Yangiyo‘l shahrining “Ixtisoslashgan Yangiyo‘l shahar dehqon bozori” Toshkent shahrining Oloy bozori, Qo‘yliq dehqon bozori va Mirobod dehqon bozorida (kungaboqar yog‘i 24 000 so‘m) kuzatildi. Shuningdek, mazkur bozorlarda kungaboqar yog‘ini minimal 16 000–20 000 so‘m oralig‘ida ham xarid qilish mumkin.
Shakar – 7 300 so‘mdan 9 000 so‘mgacha (kilogramm)
Shakar mahsulotining kuzatuv natijasiga ko‘ra, minimal narxi Toshkent shahrining Farhod dehqon bozoridagi arzonlashtirilgan rastalarda (7 300 so‘m) qayd etildi.
Maksimal narxi esa Jizzax shahrining Jizzax markaziy dehqon bozori, Qarshi shahrining “Qarshi dehqon oziq-ovqat bozori”, Namangan shahrining “Namangan chorsu dehqon universal bozori” va Toshkent shahrining Farhod dehqon bozorida (9 000 so‘m) kuzatildi.
Shuningdek, mazkur bozorlarda shakarni minimal 7 300–8 500 so‘m oralig‘ida ham xarid qilish mumkin.
Bundan avval Qishloq xo‘jaligi vazirligi yaqin kunlarda sabzi narxining pasayishi kutilayotgani hamda O‘zbekistonning turli hududlaridagi sabzi narxlari monitoring qilingani haqida xabar berilgandi.
Izoh (0)